Seerkeme-baakoeh jallh lööneme-baakoeh

Gosse baakoeh eah gååvnesh

Daaletje seabradahkesne jïjnjh baakoeh mah fååtesieh juktie orre aamhtesi bïjre soptsestidh jïh tjaeledh. Gellien aejkien hijven gåarede orre baakoeh saemien maadth-baakojste seerkedh. Vuesiehtimmien gaavhtan, jis daaroen baakoem produkt daarpesjibie, guktie dellie? Edtjebe lööneme-baakoem produkte nuhtjedh, jallh buerebe orre seerkeme-baakoem darjodh?

Seerkeme-baakoeh

Daaroen-gïelen produkt lea mij akt maam gie/gïeh dorjeme. Jis mijjieh substantijvem maadth-verbeste darjodh seerkebe, minngie-gietjine –me, dellie baakoem darjome åadtjobe mij daaroen-gïelesne gjøremål. Jis minngie-gietjiem –se lissehtibie dellie orre substantijvem åadtjobe, dorjese, mij daaroen-gïelesne produkt.

Seammalaakan dej daaroen baakoejgujmie tjeneste jïh tilbud. Dïenesje, daaroen-gïelesne tjeneste båata verbeste dïenesjidh, daaroen-gïelesne tjene. Faalenasse, daaroen-gïelesne tilbud, passijve seerkeme-verbeste faalenidh. Jïh daate verbe jis aktijve maadth-verbeste faaledh, daaroen-gïelesne tilby.

Lööneme-baakoeh

Muvhten aejkien öövre geerve sjiehteles seerkeme-baakoem gaavnedh. Juktie sinsitniem hijvenlaakan guarkadidh, kaanne dellie bööremes daaroen-gïeleste baakoem löönedh.

Dagkerh lööneme-baakoeh gellien aejkien daaroen-gïelesne aaj lööneme-baakoeh. Baakoeh mah englaanten gïeleste jallh jeatjah ammes gïeleste löönesovveme leah, v.g. teknologi, litteratur, univers, global, natur, bensin, resultat, sosial, identitet, kiosk, pizza.

Ovmessie lööneme-baakoeh daaletje seabradahkesne daerpies, jïh jïjnjh dejstie gaske-nasjonaale baakoeh.