Kva er ein situasjonsanalyse?

Ein situasjonsanalyse er ein analyse av nosituasjonen til ei verksemd. For å kunne planleggje og ta avgjerder er det nyttig for ei verksemd å gjere ein slik analyse. Det er viktig å kartleggje forhold i og utanfor verksemda. Ein situasjonsanalyse kartlegg kva som er dei sterke og svake sidene for verksemda, og kva moglegheiter og truslar som ho må ta omsyn til.

Vilkåra ei verksemd arbeider under, er i stadig endring. Situasjonsanalysar må derfor gjerast jamleg for at ein skal kunne planleggje og ta avgjerder ut frå så oppdatert og korrekt informasjon som mogleg.

Dei vilkåra ei verksemd arbeider under, blir kalla arbeidsvilkår. Vi kan skilje mellom to typar arbeidsvilkår:

• interne arbeidsvilkår

• eksterne arbeidsvilkår

Interne arbeidsvilkår

Med interne arbeidsvilkår meiner vi interne forhold som verksemda kan kontrollere. Ved å analysere dei interne arbeidsvilkåra kan vi dele dei inn i interne styrkar og svakheiter.

Eit døme på ein styrke kan vere eit kjent merkenamn, som til dømes Levi's jeans eller Coca Cola.

Vi kan dele dei interne arbeidsvilkåra inn i

• produkt

• pris

• distribusjon

• marknadskommunikasjon

• personale og leiing

• økonomi

Eksterne arbeidsvilkår

Med eksterne arbeidsvilkår meiner vi eksterne forhold, altså det som går føre seg utanfor verksemda, som verksemda ikkje kan kontrollere på same måte som dei interne arbeidsvilkåra. Det er altså snakk om eksterne forhold som verksemda må rette seg etter. Ved å analysere dei eksterne arbeidsvilkåra kan vi dele dei inn i eksterne moglegheiter og truslar.

Eit døme på ein trussel kan vere ein pandemi, som koronapandemien. Frå mars 2020 kom regjeringa med dei sterkaste og mest inngripande tiltaka vi hadde hatt i Noreg i fredstid, og mange verksemder blei hardt ramma.

Vi kan dele dei eksterne arbeidsvilkåra inn i

• kundar og marknaden

• konkurrentar

• leverandørar og distributørar

• offentlegheita

• samfunnet