Arbeidsoppdrag
Laging av sorbé
I desse oppgåvene skal du utforske ulike måtar å lage sorbé på, og du skal teste konsistens og haldbarheit.
Bilete: Alena Rudenko / CC BY-NC-SA 4.0
Sorbé kan lagast på fleire måtar. I denne oppgåva skal du teste ut kva for ein av måtane du synest gir best resultat.
Finn ei grunnoppskrift på bringebærsorbé, og lag dobbel porsjon. Del så smeten i tre delar.
- Ein tredel skal du køyre i ismaskin.
- Ein tredel skal du tilsetje litt smelta gelatin og køyre i ismaskin.
- Ein tredel skal du fryse for hand. Her tilset du i tillegg piska eggekvite i smeten og rører omtrent kvart 15. minutt.
Husk å merke sorbéane tydeleg slik at dei ikkje blir blanda saman på frys.
Legg opp ei kule av sorbéane på kvar sin tallerken.
- Smak på kvar av sorbéane, og beskriv konsistensen. Er det nokon forskjell i konsistens på dei tre sorbéane? Kva for ein likte du best?
- Registrer kor fort isane smeltar etter at du har lagt dei opp. Er det nokon forskjell på kor fort dei smeltar?
- Kva er fordelane og ulempene med dei tre måtane å lage sorbé på?