Raudlauk

Raudlauk har god haldbarheit. Han bør oppbevarast tørt og helst mellom 0 og 2 gradar. Sidan lauk set smak på produkt han blir lagra saman med, bør han helst ikkje oppbevarast saman med andre matvarer. Den norske sesongen for raudlauk strekker seg frå juli til mai.

Raudlauk set eit fint fargepreg i rå salatar og elles dei fleste andre stader der vi nyttar vanleg gul lauk. Vi nyttar gjerne raudlauk i rettar der vi vil ha ein mildare smak, og han kan fint etast ubehandla. Du kan gjerne eksperimentere litt med raudlauken, til dømes ved å blande han med andre laukar og grønsaker. Han er òg god i silderettar.

Vi kan sylte raudlauken og nytte han til grillmaten, tacoen eller kva vi måtte ønske. Du finn ei oppskrift på sylta raudlauk på nettsida frukt.no.

Raudlauk er mild på smak, men inneheld ein kraftig antioksidant, noko som indikerast av den skarpe raudfargen. Den hjelper til med å førebygge diabetes, hjarte- og karsjukdommar og nokre former for kreft. Det er dei delane av lauken med mest farge som inneheld flest antioksidantar. Du kan sjå på biletet at kjernen i lauken er lys, medan dei ytste laga har ein djup raudfarge. Det er sunt å ete mykje lauk. Gjer det til ein vane å ha han med blant ingrediensane når du lagar mat.

Raudlauk inneheld som annan lauk noko vitamin A, B og C i tillegg til mineral.

Sjå Matvaretabellen frå Mattilsynet for nærare opplysningar om næringsinnhaldet.

I den korte filmen under kan du lære meir om ulike lauktypar og få tips om korleis dei kan bli laga til og serverte.

I den korte filmen under kan du lære meir om eigenskapar ved ulike lauktypar og dei mange bruksområda dei har.