Demografisk segmentering
Omgrepet demografi kan definerast som «det vitskaplege studiet av dei kvantitative sidene ved menneskelege populasjonar, særleg storleiken på og samansetjinga og utviklinga av populasjonen». Demografisk informasjon finn vi mellom anna i offentlege statistikkar.
Finn demografisk informasjon hos Statistisk Sentralbyrå (ssb.no)
Demografisk segmentering betyr å dele marknaden inn i grupper på grunnlag av variablar som alder, kjønn og inntekt, for å nemne nokre. Sidan det ofte er ein nær samanheng mellom demografiske variablar og bestemte ønske og behov, er dette kanskje den vanlegaste måten å segmentere ein marknad på. Til dømes er det sjølvsagt at aldersgruppa seks til tolv år er eit viktig segment å satse på i fotballkortmarknaden, medan produsenten neppe bruker mykje ressursar på å kommunisere med foreldra til målgruppa.
Demografisk informasjon har den fordelen at han er relativt lett å talfeste, og dermed blir det også enkelt å bruke han statistisk. Nedanfor ser du nokre døme på korleis dei ulike kategoriane kan delast opp i undergrupper:
- Alder
under 6, 6–11, 12–19, 20–34, 35–49, 50–64, 65 og over - Kjønn
kvinne, mann - Sivil status
gift, sambuar, einsleg - Familiestorleik
1–2, 3–4, 5–6, over 6 - Familietype
ektepar med barn, ektepar utan barn, sambuarpar med barn, annan familietype - Inntekt
under 150 000, 150 000 – 200 000, 200 000 – 300 000, osb. - Yrkesgrupper
heimearbeidande, studentar, sal og serviceyrke, bønder og fiskarar, industrioperatørar, akademiske yrke osb. - Utdanning
grunnskule, vidaregåande skule, fagutdanning, universitet/høgskule osb. - Nasjonalitet
norsk, svensk, dansk, fransk, amerikansk osb. - Religion
katolikk, protestant, muslim, jøde osb.