Øvelse
Kommuniser med ulike målgrupper
Ein interiørkonsulent, ein blomsterdekoratør eller ein gullsmed bør finne ut mest mogleg om målgruppa for å levere produkt eller tenester som passar til kunden. Dette er ein viktig del av idéutviklinga. I denne oppgåva trener du på kommunikasjon med ulike målgrupper du vil møte i yrket du har valt.
Frisøren forstår ønska til kunden. Bilete: George Rudy / CC BY-NC-SA 4.0
Målgruppe er ei gruppe eller kategori av personar med nokre fellestrekk. Målgrupper blir danna ved at du deler menneske inn i grupper ut frå ulike kriterium som kjønn, alder, utdanning, livsstil og forbruksmønster.
- Jobb saman med ein medelev. Beskriv fire ulike målgrupper. Bruk segmenteringskriteria over, og skriv ned stikkord på lappar. Lag ein lapp for kvar av dei fire målgruppene.
- Ta utgangspunkt i ditt valde yrke eller fag. Trekk ein lapp og les stikkorda høgt. Ein speler rolla som kunden, og den andre tek imot kunden. Byt på rollene.
- Spel rollespelet i frisørsalongen, blomsterverkstaden eller rommet der du jobbar med metall, tre eller tekstil på skulen. Eller legg fram ulike material- og fargeprøvar, produktkart, inspirasjonsbilete eller skisser.
- Diskuter korleis du opplever å vere kunde i dei ulike rollene, og korleis de endra dykk som fagfolk i kommunikasjonen med dei ulike målgruppene.
Dersom du har moglegheit til å vere i praksis, ha reelle oppdragsgivarar, starte ungdomsbedrift eller ta imot kundar i salong eller verkstad på skulen din, er det den beste måten å lære om målgrupper og kommunikasjon med kundar.
Skisse og material- og fargeprøvar brukt i møte med kunde. Bilete: Mary Evans Picture, NTB scanpix / CC BY-NC-SA 4.0