Fagstoff

Interaktivt innhald

Kopling av hydraulikk og kraftuttak

Når du koplar traktor og reiskap, må hydraulikk, kraftuttak og slangar koplast rett og sikkert. Lær korleis dobbeltverkande hydraulikk fungerer, korleis du festar PTO-akslingen, og kva du må sjekke for å unngå ulykker og feil.

Undersida av ein traktorhengar med ein hydraulisk sylinder som har løfta opp hengarplanet så det skrår bakover. Foto. — Traktorhengar med hydraulisk tippsylinder.

Kopling av hydraulikk

Svært mange vogner og reiskapar har hydrauliske sylindrar som du kan styre frå førarplassen. Både gamle og nyare traktorar har oljeuttak med oljetrykk bak, så du kan betene dei når du står bak traktoren.

Dobbeltverkande hydraulikk

På traktoren er det to hokoplingar som verkar saman. Når du gir trykk på den eine, går oljen i retur gjennom den andre.

Når vogna eller reiskapen er kopla til trekkroken eller trepunktfestet på traktoren, skal hydraulikkslangane koplast til desse uttaka. Slangane har hannkoplingar og er ofte merkte med fargar slik at dei lett kan koplast rett til hokoplingane på traktoren. Nye traktorar har ofte "push and pull"-koplingar:

Trykk slangen inn for å kople til.
Dra slangen ut for å kople frå.

På eldre koplingstypar må vi først trykke inn ein låsering på hokoplinga for å opne låsen. Det gjeld både under tilkopling og fråkopling.

Seks hydraulikkslangar frå ein reiskap er festa til hydraulikkuttak bak på traktoren. Slangane er merkte med plastremser i ulike fargar som viser kvar dei skal koplast til. Foto. — Sånn kan det sjå ut når du har kopla hydraulikkslangane frå ein reiskap til traktoren.

Kopling av kraftuttak, bremseslange og lys

Kraftuttaket (PTO) er ein tapp bak på traktoren, og der koplar vi til akslingen. Han overfører kraft frå traktormotoren til ein tilkopla kraftuttaksdriven reiskap eller ein tilhengar. Vi må til dømes kople på PTO-akslingen når vi bruker gjødselvogn.

Traktor sett bakfrå med kraftoverføringsaksel, trekkarmar, toppstag og trekkrok. Det er òg fleire tilkoplingspunkt for hydraulikk der. Foto. — Kraftuttak med vernedeksel bak på traktoren.

Fronten på ein traktor med kraftuttak, toppstag og trekkarmar for frontmontert reiskap. Foto. — Det kan òg vere kraftuttak i fronten av traktoren. Legg merke til det gule vernedekselet.

Visste du at ...

PTO står for Power Take Off.

Tryggleik

Kraftoverføringsaksling mellom traktor og slåmaskin. Det er eit vernedeksel av plast rundt akslingen. Foto. — Kraftoverføringaksling med vernedeksel og kjetting som er festa til traktoren for at dekselet ikkje skal rotere.

Kraftoverføringsakslingar har eit vernedeksel av plast som må vere heilt, og ein kjetting på kvar side som skal festast til traktoren og reiskapen. Desse skal hindre at vernedekselet roterer.

Ved kopling av akslingar er det viktig å hugse å gjere følgande:

Stopp motoren.
Sett akslingen på PTO-tappen og skyv til det stoppar seg i låsen. Trykk inn låsen og skyv vidare inn til han låser seg.
Kontroller at kraftoverføringsakslingen sit fast ved å dra i han.
Set inn eventuell bremseslange og lysleidning til tilhengar eller reiskap til slutt.

Hydraulikkslangar og lysleidning

Klikk på biletet under for å gjere deg kjend med hydraulikkslangar og lysleidning.

Slutt på ikkje-tilgjengeleg innhald.