Spreiing av husdyrgjødsel

Blautgjødsel

Blautgjødsel er husdyrgjødsel der tørrstoffinnhaldet kan variere frå 6 og opp mot 14 prosent. Gjødsel frå både sau, storfe og gris kan lagrast som blautgjødsel. Det er lite tap av næringsstoff ved lagring, men under spreiing er faren for tap stor. Spreieutstyr og vêrforhold påverkar kor stort tapet blir.

Røring

Før blautgjødsla skal køyrast ut, set vi på røring for å blande innhaldet godt. Dette gjer vi helst ein dag eller to før vi skal begynne å spreie gjødsla på åker og eng. Det finst fleire variantar av røreutstyr. Røringa blir driven av ei pumpe som er kopla til kraftoverføringa på traktoren.

Gjødselgass

Under omrøringa er det viktig å sørge for god ventilasjon i fjøset for å unngå gjødselgassforgifting. Gjødselgassen består av mange ulike gassar, men den viktigaste er hydrogensulfid (H₂S) som kan gi alvorleg forgifting med dødeleg utfall hos både dyr og menneske. Du kan hindre at gjødselgassen samlar seg i dyreromma ved å opne dører og vindauge i fjøset.

Når røringa er ferdig, blir husdyrgjødsla pumpa opp frå gjødsellageret og anten opp i ei gjødselvogn eller vidare inn i ein slepeslange.

Vogn

Det finst gjødselvogner i mange storleikar, og dei kan romme frå rundt 3 000 liter til over 20 000 liter. Vogna må trekkast av traktor. På vogna monterer du det spreieutstyret du ønsker. Traktor og full vogn er ein tung ekvipasje som kan gi køyre- og pakkeskadar, spesielt viss du køyrer under blaute forhold.

Slepeslange

Ein slepeslange kan vere fleire hundre meter lang. Kor lang han kan vere, kjem an på kor kraftig gjødselpumpe du har. Slepeslangen blir kopla til gjødselpumpa og lagd ut på åkeren eller enga du skal gjødsle. Når du skal starte, koplar du slangen til spreieutstyret bak på traktoren. Under køyringa blir slangen trekt etter deg. Det er viktig å legge ut slepeslangen på rett måte slik at du ikkje må køyre over han, og slik at du får dekt heile arealet.

Ved bruk av slepeslange i staden for vogn er risikoen for køyre- og pakkeskadar kraftig redusert. Samtidig er bruk av slepeslange avgrensa av avstanden frå gjødsellageret.

Spreieutstyr for blautgjødsel

Fanespreiar/breispreiar

Gjødsla blir spreidd ut over arealet ved hjelp av slepeslange eller vogn. Denne typen spreier kastar gjødsla gjennom lufta og ned på bakken. Denne "lufteturen" aukar sjansane for nitrogentap, og det er derfor viktig å spreie gjødsla ved låge temperaturar når det er lite vind og gjerne litt duskregn. Breidda på arealet som blir gjødsla, vil variere avhengig av type utstyr som blir brukt, men vanlegvis er det 10–12 meter.

Stripespreiar

Traktormontert utstyr som blir festa til slepeslange eller vogn. Denne løysinga medfører mindre nitrogentap samanlikna med fanespreiar, ettersom gjødsla blir lagd ut i striper direkte på bakken. Stripespreiarane har ei arbeidsbreidde på 8–15 meter, avhengig av merke og modell.

Beitespreiar/gjødselkanon

Beitespreiar kan brukast der andre spreiemetodar ikkje er moglege å bruke, som i svært bratt terreng eller på våt myrjord der du ikkje kan bruke traktor. Denne typen spreiar har stor rekkevidde og kan kaste gjødsla opptil 50 meter til kvar side.

Gjødselnedfellar

Dette er ein variant av stripespreiarar, der ein nedfellar plasserer gjødsla under plantene og litt ned i jorda. Kvar slange har ein slepesko som skjer eit lite spor i jorda der gjødsla blir lagd. Ein annan type nedfellar, DGI-spreiaren, "skyt" gjødsla direkte ned i jorda. Fordelane med nedfellarar er at nitrogentapet blir redusert, og at plantene ikkje blir tilsølte av husdyrgjødsel. Dette reduserer òg risikoen for forureining av fôr. Nedfellarar kan koplast til vogn eller slepeslange.

Tørrgjødsel

Husdyrgjødsel frå fjørfe og hest må spreiast som tørrgjødsel eller fastgjødsel. Ein del sauebruk og ammekubruk har òg tørrgjødsel, som oftast i form av talle. Talle er ei samantråkka blanding av strø, urin og avføring. Strøet kan vere halm, flis, torv eller bork. Tallen blir teken ut når innefôringssesongen er over og blir brukt som gjødsel på jorda.

For å spreie tørrgjødsel treng du ei tørrgjødselvogn. Vognene er ein open tilhengar med eit utkastaraggregat bakarst. Utkastaraggregatet knuser klumpar og spreier gjødsla utover. Etter kvart som gjødsla blir kasta ut, blir massen i hengaren transportert bakover, anten ved hjelp av eit transportbelte i botnen av hengaren, eller ved at ein sylinder pressar massen bakover og inn i spreiarvalsane.

Valsane som kastar ut tørrgjødsla, kan stå vertikalt eller horisontalt. Dette påverkar spreiebreidda. Elles varierer storleik og kapasitet med merke og modell.

Oppgåver

1. Diskuter bruk av slepeslange kontra gjødselvogn. Kva fordelar og ulemper er det ved dei to alternativa?

2. Du skal vårgjødsle ei eng med blautgjødsel frå mjølkekyr. Enga skal bli surfôr til mjølkekyrne. Diskuter ulikt spreieutstyr med utgangspunkt i effektivitet, nitrogentap, køyreskadar og fôrkvalitet.

3. De skal køyre ut blautgjødsel med slepeslange og stripespreiar. Vel ei eng nært fjøset på skulen eller ei anna eng de kjenner. Lag ei skisse av enga og diskuter køyremønster og korleis de skal legge ut slepeslangen slik at de slepp å krysse han, og slik at heile arealet blir dekt.