Å dokumentere i bygg- og anleggsbransjen

Dokumentasjon er ei form for bevis. Det kan vere eit bevis på at du som fagarbeidar og bedrifta di har utført eit stykke arbeid riktig ut frå dei krava som blir stilte.

Det blir stilt krav i form av lover og forskrifter, desse skal alltid følgast, og i ulike standardar og normer som blir følgde der det er relevant. Som fagarbeidar må du setje deg inn i kva reglar som gjeld for det arbeidet du skal utføre, anten det handlar om HMS eller det tekniske.

Nokre av lovene og forskriftene som er viktige å følge, er desse:

• Arbeidstilsynet: arbeidsmiljølova

• Arbeidstilsynet: interkontrollforskrifta

• Lovdata: plan- og bygningslova

• Direktoratet for byggkvalitet: byggteknisk forskrift

Eigenkontroll er ein type dokumentasjon som ofte blir gjord i form av sjekklister der arbeidet er skildra i punkt som skal kontrollerast. Dette blir for det meste gjort digitalt på smarttelefon eller nettbrett, der ein tek bilete, kryssar av for om punkta er godkjende eller har avvik, og kommenterer der det er nødvendig. Dersom ein finn avvik, er det viktig å avklare kva tiltak ein bør gjennomføre for å utbetre avviket.

Eigenkontrollen blir ofte samla i ein sluttrapport til kunden, som er ei slags erklæring på at arbeidet er utført av bedrifta, og i samsvar med avtale og krava som blir stilte.

Alt ei bedrift gjer for å sikre helsa, miljøet og sikkerheita til arbeidstakarane, kan vi kalle HMS-arbeid. I internkontrollforskrifta finn vi krav til korleis dette skal gjennomførast, og formålet er mellom anna å førebygge helseskadar, miljøforstyrringar og uønskte hendingar.

Sikker jobb-analyse

Ei risikovurdering blir gjerne gjord i form av ein sikker jobb-analyse (SJA). Dei som skal utføre arbeidet, møtest og vurderer farane og kva som må gjerast for at uønskte hendingar ikkje skal skje. Ein sikker jobb-analyse må utførast før ein startar arbeidet, og gjerast i samband med alt arbeid som på ein eller annan måte kan vere farleg. Målet er å avdekke farane og eventuelt gjennomføre tiltak før noko skjer.

Rapport om uønskt hending

Om uhellet av likevel skulle vere ute, må uønskte hendingar rapporterast ved å fylle ut ein rapport om uønskt hending (RUH). I ein slik rapport blir det skildra kva som skjedde, og kvifor det skjedde. Ein slik rapport skal òg fyllast ut ved nesten-ulykker, fordi målet er å kunne gjennomføre tiltak så det ikkje skjer igjen. Det blir veldig synleg for ein entreprenør at det er behov for tiltak viss arbeidarane stadig rapporterer inn uønskte hendingar på arbeidsplassen. Sjølve rapporten kan enkelt fyllast ut og sendast inn med ein smarttelefon eller nettbrett.

Vernerundar

For å drive systematisk førebygging av ulykker kan ein gjennomføre vernarundar. Det går ut på å få oversikt over arbeidsplassen for å kunne oppdage mangelfulle sikkerheitstiltak eller farar. Det fysiske arbeidsmiljøet er òg ein del av vernerunden med tanke på forholda det blir jobba under. Funna frå ein vernerunde blir ofte delte på byggemøte, og det blir avtalt eventuelt kva tiltak som skal gjennomførast med tidsfristar. Kor ofte det blir gjennomført vernarundar, må vurderast i lys av risiko og kva som skjer på bygge- eller anleggsplassen. Vernarundar er ein god måte å drive systematisk HMS-arbeid på.

Kvifor er eigentleg dokumentasjon så viktig? På mange måtar er det ei forsikring om at arbeidet er godt nok og i tråd med lover, forskrifter, kontraktar og skildringar. Det er ei forsikring for tiltakshavar, entreprenør og kunde. Det kan òg vere eit krav frå dei som har hyra bedrifta, at dokumentasjon må på plass før dei betaler for arbeidet som er utført.

Det kan vere fleire konsekvensar av å ikkje dokumentere i samsvar med reglane. Klikk på boksane under for å sjå nokre døme de kan reflektere over.