Vedlegg: Utdrag frå Min kamp 4 av Karl Ove Knausgård (2010) og utdrag frå Soga om Gunnlaug Ormstunge, skriven ned på 1200-talet.

Begge tekstane som ligg ved handlar om forholdet mellom far og son, men det er 800 år mellom dei. Samanlikn form og innhald i dei to tekstane.

Kommentar: Du skal samanlikne både form og innhald, og du skal vise kunnskap om norrøn tid og samfunnet i dag. Du skal gjere greie for verkemiddel i tekstane, vise kva funksjon dei har og grunngi dine eigne tankar om tekstane. Bruk relevant fagspråk.

• Innleiinga gjer det ei innleiing skal gjere: Ho presenterer tekstane.

• Elles er innleiinga kjedeleg.

• Unngå å skrive "No skal eg ..." eller "I denne oppgåva vil eg ..."

• Presenter heller temaet på meir interessante måtar.

Ei fin innleiing når du skal samanlikne to tekstar.

1. I den første delen blir temaet i tekstane presentert kort, men utan å nemne tekstane:

   • Kjærleik er eit evig tema i litteraturen. Særleg den umoglege kjærleiken har fengsla lesarar i hundreår. Klassikarar som Tristan og Isolde, Romeo og Julie og Victoria handlar om menneske som ikkje kan få kvarandre. Årsaka til at temaet aldri går av moten, er nok at det handlar om sterke kjensler som alle menneske kan kjenne på.

2. I den andre delen blir tekstane introduserte med namn, forfattar og årstal:

   • Slik er det òg i romanen Mannen som elska Yngve (2003) av Tore Renberg og novella "Brokeback-fjellet" (1997) av Annie Proulx. Begge tekstane handlar om kor vanskeleg kjærleiken kan vere, når ein mann blir forelska i ein annan mann.

Legg merke til den elegante overgangen mellom dei to delane i innleiinga.

Denne innleiinga fungerer godt.

1. Innleiinga introduserer tekst 1 med eit sentralt sitat:

   • Etter et par kilometer syntes Ennis det føltes som om noen holdt på å trekke ut tarmene hans en meter om gangen". Slik beskriv novella "Brokeback-fjellet" (1997) av Annie Proulx den sjenerte cowboyen Ennis' fysiske reaksjon når han køyrer bort frå sommarjobben som gjetar i dei amerikanske fjella. Årsaka til ubehaget er rett og slett at Ennis er forelska. Men forelskinga rettar seg mot kameraten Jack, noko som ikkje var å tilrå i den amerikanske Midtvesten på 1960-talet.

2. Så introduserer den tekst 2:

   • Det same skjer i romanen Mannen som elsket Yngve (2003) av Tore Renberg. Hovudpersonen, Jarle, forelskar seg heilt uventa i ein gut som heiter Yngve.

3. Til slutt står det kort om fellestrekk ved tekstane:

   • Begge tekstane viser altså dei gledene og vanskane menn møter på når dei forelskar seg i ein av same kjønn.

Mange trur at det er lurt å ramse opp igjen alle momenta frå hovuddelen i avslutninga.

Det skaper berre ei uinteressant avslutning.

Du skal sjølvsagt ikkje kome med nye moment til tolkinga i ei avslutning, men unngå likevel å ramse opp hovudpoenga i hovuddelen på nytt.

Unngå òg subjektive meldingar av tekstane du skriv om.

Dette er ei god avslutning.

1. I den første delen blir det gripe fatt i eit poeng frå innleiinga:

   • Det er ikkje rart den umoglege kjærleiken har fengsla menneske i hundreår. Både historia om Jack og Ennis og Yngve og Jarle viser at når forelskinga er forboden, blir kjenslene endå sterkare enn når ho er ukomplisert. Tekstane viser òg at homofil kjærleik var vanskeleg både i Midtvesten på 60-talet og i Noreg på 80-talet.

2. I den andre delen blir aktualiteten i tekstane i dag vurdert:

   • Sjølv om det nok er enklare å vere to menn i eit forhold i dag, så trur eg dei fleste menn kan møte motstand frå både seg sjølv og omgivnadene sine om dei blir forelska i ein av same kjønn. Dermed vil eg seie at desse to tekstane føyer seg inn i den lange rekka av tekstar om den umoglege, lidenskapelege kjærleiken.

Det er lov med "eg" i avslutninga, men legg merke til at her blir det brukt til sjølvstendig vurdering av tekst i kontekst, ikkje subjektiv synsing om kvaliteten i tekstane.