Fagartikkel
Å samanlikne to dikt
Ei svært vanleg norskoppgåve går ut på å samanlikne tekstar. Slike oppgåver vert også gitt til eksamen. Ikkje sjeldan er det lyriske tekstar du skal samanlikne.
Ei visuell framstilling av korleis du kan skrive samanlikningar: Skriv om tekstane kvar for seg, men samanlikn undervegs. Bilete: Siren Halvorsen / CC BY-NC-SA 4.0
Når du skal svare på ei samanlikningsoppgåve, er det viktigaste at du viser god forståing av temaet tekstane tek opp og at du kan forklare korleis verkemidla framhevar temaet. I tillegg bør svaret ditt vere godt strukturert. Mange vel å analysere det eine diktet først, deretter det andre, for til slutt å samanlikne dei. Den beste løysinga vil likevel ofte vere å presentere og samanlikne dikta parallelt. Då kjem samanlikningsperspektivet tydelegare fram, og du vil sleppe å gjenta deg sjølv.
Nærlesing er ein føresetnad for å skrive ei god samanlikning av dikta. Bilete: Mimsy Møller / CC BY-NC-SA 4.0
Når du skal samanlikne to dikt, er dette ein god framgangsmåte:
- Førles dikta fleire gonger. Lag deg ei oppfatning av motiv og tema, og sjå etter likskapar og skilnader.
- Identifiser dei mest vanlege språklege verkemidla som er brukte i tekstane, og bruk riktige fagomgrep til å beskrive dei.
- Nærles dikta nøye, og noter deg korleis verkemidla er med på å framheve tematikken i dikta.
- Skriv analysen. Legg vekt på god struktur og god tekstbinding.
Læringsstien «Korleis samanlikne to dikt» fører deg gjennom dei ulike fasane i analysearbeidet.