Alt vi har til felles

Del 1: Alt vi deler

1. Sjå videoen via nettsida til TV2: Dansk reklamefilm rører hele verden.
2. Kva meiner du er hovudbodskapen i denne videoen?
3. Kanalsjef for Dansk TV2, Lotte Lindegaard seier dette om bakgrunnen for videoen: Det er eit altfor stort fokus i samfunnet (media, skule, politikk) på det som skil oss. Diskuter påstanden.

Del 2: Verkemiddel

1. Beskriv bruken av musikk i denne videoen. Kva slags verknad har han på deg?
2. Kva slags motsetningspar bruker forteljaren for å beskrive menneske i starten av videoen? Er det vanleg å setje desse gruppene opp mot kvarandre?
3. Korleis blir stemninga framstilt blant menneska som er med i videoen heilt i starten? Kva skjer med stemninga når dei blir spurde: "Kven var klassen sin klovn?" Diskuter kva som skjer her, og korleis videoen får fram dette skiftet.
4. Finn på nye spørsmål som kan skape fellesskap på tvers av grupper i samfunnet. Prøv dei ut i klasserommet.

Del 3: Patosappell

1. Kva slags kjensler kjenner du på gjennom dei ulike scenene i videoen? Og kva slags kjensle sit du igjen med på slutten? Skriv ned for deg sjølv først. Diskuter og samanlikn så med ein medelev.
2. Den retoriske appellforma patos er mykje i bruk i denne videoen. Kva kjensler trur du dei som har laga videoen, vil appellere til hos oss?
3. Korleis kunne bodskapen blitt presentert med meir vekt på logosappell?
4. Diskuter: Kva kan du lære av denne videoen som du kan ta med deg i kvardagen?

Del 4

Skriv ein analyse av denne samansette teksten, der du spesielt ser på korleis patosappellen i videoen fungerer:

• Analyser verkemidla som er i bruk for å understreke og spele på kjensler gjennom lyd, ord og bilete.
• Kva slags verknad har desse verkemidla på mottakar?
• Filmen er ein reklame for ein TV-kanal. Kva trur du kanalen oppnår ved å lage ein film som dette?
• Til slutt i teksten skal du reflektere over temaet og bodskapen i reklamevideoen.