Bruk BookBites

Før elevane bruker BookBites

Desse fagomgrepa er nyttige å snakke med elevane om når de skal ta i bruk BookBites:

Ikon

Eit ikon er eit bilete som skal illustrere noko. Ofte er det ei forenkla teikning. Dei små bileta som blir viste øvst på verktøylinja på pc-en din, er slike ikon. Ikona skal hjelpe deg med å forstå kva som er innhaldet bak dei ulike knappane.

E-bok

Ei e-bok er ei digital bok som du kan lese til dømes på mobil, pc eller nettbrett. Ho liknar på ei fysisk bok sidan du kan bla frå side til side. Men i tillegg kan du i enkelte e-bøker søke opp ord via ordbok eller få teksten lesen opp.

Heim-ikon

Heim-ikonet er eit ikon som ofte ser ut som eit lite hus. Når du trykker på ikonet, vil du komme tilbake til framsida på nettsida, altså heim.

Lyd-ikon

Lyd-ikonet er eit ikon som illustrerer lydbølger. Når du trykker på ikonet, har du ofte anledning til å justere lyden, eller volumet, høgare eller lågare, eller skru lyden av eller på.

Forstørringsglas

Eit forstørringsglas er eit verktøy som gjer at noko blir større og slik lettare å sjå. Når du trykker på ikonet med bilete av eit forstørringsglas, kan du få opp storleiken eller zoome inn på ein enkelt del.

Kva er BookBites?

BookBites er ein app der du kan låne e-bøker og lydbøker gratis frå norske bibliotek. Appen har ganske mange ulike funksjonar. I presentasjonen under finnar du ein enkel gjennomgang av dei viktigaste funksjonane i BookBites. Presentasjonen er fin å vise for elevane før dei tek appen i bruk.

• Powerpoint BookBites(PPTX)

Ressursar knytte til undervisning

BookBites har mange ressursar knytte til undervisning og bruk i skulen. I presentasjonen kan du lære deg det mest grunnleggande om appen. I tillegg kan det vere ein fordel at du som lærar utforskar appen og mogelegheitene han gir i klasserommet på eiga hand og saman med elevane.

På nettsidene til BookBites under "Ressursar og lesemateriale" finn du rettleiingar og tips for å komme i gang med bruk av BookBites saman med klassen.

Nedlasting av BookBites

Elevane kan laste ned appen "BookBites" via Google Play eller App Store. For å bruke appen må dei ha eit lånekort på eit norsk bibliotek. Elevane må registrere lånekortet sitt i appen for å få tilgang til bøkene, men dei kan òg få tilgang via Feide-innlogging.

Korleis ta i bruk BookBites?

Etter at elevane har fått sett presentasjonen, kan dei utforske BookBites med ulike oppgåver. Då blir dei kjende med appen på ulike måtar. Du finn oppgåver under "Relatert innhald" nedst i denne ressursen. Målet er at elevane skal få auka leseferdigheitene sine gjennom å lese og lytte meir. For å få til dette er det fint å gi det tid i undervisninga. Her kan du som lærar tilpasse ut frå kvar enkelt elevgruppe og kvar enkelt elev sine behov.