Oppgåve

Interaktivt innhald

Flukta frå den galne greven

Er du klar til å møte ein greve som er galen etter grammatikk? I denne oppgåva skal du gå inn i eit kodekammer. Der skal du løyse grammatikkoppgåver og samle vakre steinar for å sleppe ut av det flotte, men skumle huset til greven.

Ein mann på rundt femti år står midt i eit stort rom. Det er høgt under taket. Langsmed veggene rundt han står det tunge, gamle møbel, og på veggene heng det oljemåleri. Mannen er kledd i ein staseleg mørk dress med kvit skjorte og sløyfe. På hovudet har han ein svart flosshatt. Han støttar seg på ein spaserstokk og ser alvorleg og bestemd inn i kamera. Foto. — I dette kodekammeret møter du ein greve som er galen etter grammatikk. Du kjem til å finne ut kva som driv han, men då må du først bevise at du meistrar norsk grammatikk!

Til læraren

Dette kodekammeret handlar hovudsakleg om grammatikk, men det er òg nokre element i kammeret som skal skape mystikk og forklare kvifor hovudpersonen, den galne greven, har blitt til den han er. Når elevane bevegar seg gjennom kodekammeret, vil dei komme innom fem rom:

I Syntaksrommet skal elevane lage setningar med ord i rett rekkefølge.
I Verbrommet skal elevane bøye verb og vise at dei kan bruke preteritum og (presens) perfektum på rett måte.
I Substantivrommet skal elevane bøye substantiv og vise at dei kan bruke bestemd og ubestemd form av substantiv korrekt.
I Adjektivrommet skal elevane bøye adjektiv.
I Meisterprøve-rommet skal elevane lære meir om den gåtefulle bakgrunnen til greven og bli betre kjende med den avdøde kona hans.

Tips

Spel gjennom kodekammeret sjølv før du prøver det ut med elevane. Då blir det lettare for deg å gi elevane råd og tips undervegs.
Dette kodekammeret krev ein aktiv lærar som hjelper dei som sit fast. Elevane skal prøve og feile litt undervegs i kodekammeret, men det er viktig at du passar på å hjelpe dei som mistar motet.

Kva skal du gjere?

Konkurrer om å bli den eller dei første som kjem seg ut av huset til greven. De kan jobbe i par eller åleine.

Tips

Trykk på ikonet øvst i høgre hjørne for å få sett kodekammeret i fullskjermvisning. Dette er viktig for at du skal få med deg alle detaljane.
Du bevegar deg rundt i romma ved hjelp av pc-musa.
Viss hand-symbolet blir til ein peikefinger, er det verdt å stoppe opp og lese.
Ta deg tid til å lese teksten nøye. Spesielt viktig er sceneskildringane. Viss du har behov for å lese dei ein gong til, trykk på i-en nedst til venstre i biletruta.
Du kan få lyd ved å trykke på lydikonet nedst til venstre.

Kodeark

Det er lurt å skrive ned kodane du finn undervegs. Du kan laste ned dokumentet nedanfor. Det kan hjelpe deg å halde styr på kodane du finn.

Kodeark til kodekammeret "Flukta frå den galne greven"(DOCX)