Kva er eit setningsadverbial?

Dette er starten av ein læringssti om setningsadverbial.

Sjå nærare på desse fagomgrepa før du les teksten:

Setningsledd

Setningsledda er dei ulike delane i ei setning. "Subjekt", "verbal"og "objekt"er tre ulike setningsledd. I setninga "Per og Nina ser ein gut" er "Per og Nina" subjekt, "ser" verbal og "ein gut" direkte objekt.

Subjekt

Subjektet er setningsleddet som utfører ei handling i ei setning. I setninga "Muhammed drikk vatn" er "Muhammed" subjekt.

Forteljande hovudsetning

Forteljande hovudsetningar er dei vanlegaste setningane som ikkje er spørsmål eller leddsetningar. Vi bruker desse for å fortelje noko: "Anna et" og "Eg må sove".

Leddsetning

Leddsetningar er setningar som ikkje kan stå åleine ("fordi vi er sjuke"). Vi kjenner dei igjen ved at dei startar med ein subjunksjon: at, når, fordi, då...

Setningsadverbial er ord som er viktige for innhaldet i setninga. Utan dei ville ikkje setninga betydd det same. Sjå til dømes på dei to setningane

• "Han kjem aldri", der "aldri" er setningsadverbial

• "Eg kjem ikkje", der "ikkje" er setningsadverbial

Tek vi vekk desse to setningsdverbiala, blir innhaldet i setninga heilt annleis:

• Han kjem.

• Eg kjem.

Legg merke til at "adverb" betyr "til verbet". Setningsadverbiala beskriv altså verbet i setninga nærare.

Setningsadverbial som dempar innhaldet

"Ikkje"og "aldri" er setningsadverbial som kan forandre heile meininga i setningane. Andre setningsadverbial kan dempe innhaldet. Det betyr at innhaldet i setninga blir litt meir forsiktig uttrykt. To døme er setningane

• "Eg kjem kanskje" der "kanskje" er setningsadverbial

• "Han kjem ofte" der "ofte" er setningsadverbial

Setningsadverbial som styrker innhaldet

Andre setningsadverbial gjer det motsette: Dei styrker innhaldet. Sjå til dømes på setningane

• "Han kjem sjølvsagt" der "sjølvsagt" er setningsadverbial

• "Han kjem sikkert" der "sikkert" er setningsadverbial

Andre setningsadverbial er berre, òg, alltid, sjeldan, heller.

På norsk er det faste reglar for kvar setningsadverbialet skal stå. Du bør lære deg dei viktigaste reglane om kvar setningsadverbialet skal stå i ulike typar setningar:

• Setningsadverbial i heilsetningar

• Setningsadverbial når subjektet ikkje står først i setninga

• Setningsadverbial i spørjesetningar

• Setningsadverbial i leddsetningar

Gå vidare i læringsstien for å sjekke om du klarer å finne setningsadverbialet i ulike setningar.