2040

Om filmen

I eit framtidig samfunn, i året 2040, kan vi ha funne løysingar på nokre av dei store klimautfordringane i verda. Det blir drive regenerativt jordbruk, og det blir dyrka tang og tare som blir brukt til karbonfangst. Sjølvkøyrande bilar blir brukte til samkøyring for å avgrense utslepp, og det blir sett inn tiltak for å spore og spare energibruk i lokalsamfunn. Filmen set òg fokus på sosiale tiltak, som utdanning av jenter, og kva det kan ha å seie for berekraft.

Alle desse tiltaka føreset at vi startar omgåande, for å betre situasjonen innan 2040. Filmskaparen stiller dette spørsmålet: Kan innsatsen vi legg ned for miljøet i dag, gi dottera Velvet ei betre framtid?

Tematikken i filmen

Dokumentaren 2040 handlar om berekraft som vårt felles prosjektet. Men i staden for å rette kraftig kritikk mot systema som ikkje fungerer optimalt i dag, set han fokuset på alle dei potensielle løysingane. Då filmskaparen valde kva som skulle løftast fram i filmen, avgrensa han seg til løysingar som allereie er tilgjengelege, eller har eit realistisk potensial til å kunne reversere klimaendringar innan 2040.

Tema som blir tekne opp, er mellom anna fornybar energi, berekraftig jordbruk, marine permakulturar og sosial innsats for å styrke kvinnenes stilling i samfunnet.

Korleis filmen eignar seg i skulen

Filmen eignar seg svært godt innan det tverrfaglege temaet berekraftig utvikling. Den stiller gode og vanskelege spørsmål om måten vi lever på i dag, og korleis vi kan unngå at økosystema våre kollapsar. Det handlar om klima og miljø, men òg om framtidshåp og dialog på tvers av generasjonar.

I den overordna læreplanen fell temaet innunder klima og miljø, og då med spesielt fokus på forbruk, forureining, forvaltning og fordeling av naturressursar.