Oppgåve

Livsstilen din

Bli bevisst på din eigen livsstil ved å utforske aktivitetsnivå, skjermtid, søvnmønster og kosthald.

Mobiltelefon og notisblokk i midten, treningsutstyr og mat rundt. Foto.

Bakgrunn

Det er godt dokumentert at livsstilen vår, som omfattar mellom anna fysisk aktivitet og kosthald, har mykje å seie for helsa vår. Ein av dei verkeleg store helseutfordringane i dagens samfunn er inaktivitet i kvardagen. Endringar i reisevanar og arbeidsrutinar, tilgang til informasjon på internett og lettvinte løysingar på mange område gjer at vi beveger oss mindre og mindre. Talet på personar med fedmeproblem aukar faretruande i befolkninga. Derfor er det viktig å bli bevisst.

Bilete: Helseundersøkelsen i Trøndelag, NTNU / Avgrensa gjenbruk

HUNT – Helseundersøkinga i Trøndelag

HUNT er den største samlinga i Noreg av helseopplysingar om ei befolkning. Opplysingane blir innhenta ved hjelp av eit spørjeskjema, eit intervju og ein helsesjekk.

Målet med HUNT er å finne ut mest mogleg om kva som påverkar helsa vår. Dette er eit vanskeleg forskingsområde, sidan helsa vår blir påverka av veldig mange faktorar. Fordelen med HUNT er at undersøkinga følgjer ei stor gruppe menneske over tid. Derfor kan ho gi oss verdifull informasjon om faktorar som fremjar helse, og faktorar som kan forårsake sjukdom.

Ung-HUNT er ei undersøking av ungdom i alderen 13–19 år. I dag omfattar denne undersøkinga til saman 10 000 ungdommar i Trøndelag.

Den første undersøkinga, Ung-HUNT1, blei gjennomført i perioden 1995–1997. Sidan den gong har det blitt gjennomført tre undersøkingar til. Den siste, Ung-HUNT4, blei avslutta i 2019.

Oppgåve

Målet med oppgåva er at du gjennom auka bevisstgjering om din eigen livsstil skal kunne skape gode vanar i kvardagen – og på den måten få best mogleg livskvalitet.

I denne oppgåva skal du

bli bevisst på og loggføre aktivitetsnivå, skjermtid, søvnrytme og kosthald i 4–7 døgn ved hjelp av oppgåver og eit eige registreringsskjema lenger ned (Livsstilen din – oppgåver og loggføring).
innhente relevant bakgrunnsteori og lage ei grafisk framstilling av eigne resultat ved å bruke statistikk
skrive rapport der du sjølv vurderer eigne resultat og samanliknar dei med nasjonale tilrådingar og data frå Ung-HUNT. Bruk reknearket Ung-HUNT-data.

Livsstilen din – oppgåver og loggføring_NN(XLSX)
Ung-HUNT-data_NN(XLSX)

Rapporten skal innehalde

relevant bakgrunnsteori som omhandlar nasjonale tilrådingar for søvnbehov, skjermtid, kosthald og fysisk aktivitet
beskriving av metode for innhenting av eigne data
grafisk framstilling av eigne resultat
drøfting av og refleksjon over eigne resultat samanlikna med nasjonale tilrådingar og Ung-HUNT-data
kjeldetilvisingar

Tips og triks!

Kritisk tenking og kjeldekritikk

Statistikk og forsking

Rapportmal

Rettleiing til læraren

Livsstilen vår blir påverka av dei vala vi tek i kvardagen, men også av sosiale faktorar. Dette omfattar forholdet elevane har til seg sjølve, til andre og til det sosiale miljøet i klassen, i heimen og på fritida. Dette er det viktig å vere klar over når du skal rettleie elevar i denne oppgåva.

Oppgåva er berekna å ta cirka 15 undervisningstimar, som gjerne kan fordelast over tre veker. Ho er godt eigna som ei tverrfagleg oppgåve i faga kroppsøving, naturfag og matematikk.

Vedlagt ligg spørjeskjemaet til Ung-HUNT. Det kan brukast til å gjennomføre undersøkinga i klassen. Resultata frå klasseundersøkinga kan brukast på fleire måtar:

Du kan rettleie elevane i korleis dei kan framstille eigne resultat ved bruk av statistikk.
Du kan tilpasse oppgåva og gjere ho meir generell: Elevane kan, i staden for å samanlikne eigne data, samanlikne dataa frå klassen med nasjonale tilrådingar og Ung-HUNT-data.
Du kan tilpasse oppgåva og gjere ho endå meir omfattande: Elevane kan, i tillegg til å samanlikne eigne resultat, også samanlikne dataa frå klassen med nasjonale tilrådingar og Ung-HUNT-data.