Ekspertgrupper

Metoden ekspertgrupper eignar seg godt å bruke når de skal samanfatte eit tema de har jobba med. Elevane jobbar i basisgrupper som til saman skal løyse ei større oppgåve. Gruppemedlemmane får kvar si oppgåve som dei skal fordjupe seg i og bli "ekspertar" på.

Det dei lærer i løpet av fordjupinga, skal dei dele og diskutere med dei andre på gruppa til slutt. Alle må gjere biten sin for at gruppa skal lære best mogleg!

• Del klassen i basisgrupper på fire til seks elevar.

• Ta utgangspunkt i eit tema, og lag like mange oppgåver til temaet som det er elevar i gruppene.

• Kvar elev får tildelt ei oppgåve slik at alle som er på same gruppe, har ulike oppgåver.

• Lag oppsummeringsoppgåver som hjelper elevane å samanfatte temaet når dei skal dele og diskutere til slutt.

Individuelt arbeid (20 minutt)

Jobb individuelt og fordjup deg i dei oppgitte kjeldene og svar på spørsmåla under temaet ditt. Bruk gjerne andre ressursar òg.

Ekspertgrupper (10 minutt)

Set dykk saman i ekspertgrupper og jobb saman i 10 minutt. Dei som har fordjupa seg i same tema, skal no sitje saman. Del det de har funne ut. Hjelp kvarandre til å forstå, og bli einige om kva som er viktigast. Førebu dykk på korleis de skal presentere temaet dykkar for basisgruppa.

Deling og diskusjon (15–20 minutt)

Set dykk tilbake i basisgruppene, og presenter for kvarandre det de har funne ut. Presenter i rett rekkefølge. Kvar ekspert får 3–4 minutt til å presentere.

Løys samansette oppgåver (20 minutt)

Til slutt jobbar de med oppgåver der de må bruke kunnskapane frå alle ekspertane på gruppa for å finne ei løysing.

I relatert innhald på denne sida kan de sjå døme på korleis denne metoden er brukt i ulike tema.

Social Psychology Network. (u.å.). The Jigsaw Classrom. Henta 17. januar 2023 frå https://www.jigsaw.org/#overview

TV 2 Skole. (u.å.). Ekspertgrupper eller ekspertpuslespill. Henta 17. januar 2023 frå https://www.elevkanalen.no/artikkel/openartikkel/99439