Sjekkpunkt for eigne produksjonar

«Alt som kan gå gale, går gale.»

Kanskje har du også møtt på det som blir kalla Murphy’s Law: «Alt som kan gå gale, går gale.» Å finne ut at du har gløymt batteri, ikkje har sikkerheitskopi, eller at lyden ikkje fungerer som ønskt, høyrer med når du øver deg i å bli ein profesjonell medieprodusent.

Kanskje har du opplevd at du ikkje vart ferdig i tide og fått beskjed om at deadline er heilag i mediebransjen?

Sjekklister

Ei sjekkpunktliste kan bidra til at du møter mindre motstand og færre utfordringar i neste produksjon.

1 Førproduksjon

Avklaringsfase

• Hald brief, kickoff eller redaksjonsmøte, avklar og definer behov, oppdrag, utgangspunkt og problemstillingar.
• Er målet for arbeidsoppgåva forstått? Kva er føremålet for produksjonen?
• Kva for bodskap skal ut? Kva er det oppdragsgivaren ønskjer? Spør heilt til du er sikker på at du har forstått det riktig.
• Kartlegg og undersøk målgrupper, lag personas.

Planlegging

• Få ei oversikt over rammene for produksjonen, tid og ressursar.
• Kven bidreg, og kva for kompetansar og nettverk har desse personane?
• Kor lang tid har de på dykk? Kven gjer kva?
• Kva for utstyr trengst og er tilgjengeleg?
• Lag ein produksjonsplan for å halde tidsfristar.

Inspirasjon, idéutvikling og design

• Opne opp for moglege idear. Det er viktig å jobbe fram mange gode idear som de kan assosiere vidare ut frå. Det er ikkje eit mål i denne fasen at ideane skal vere realistiske.
• Bruk penn, papir og teiknesaker. Gå på stader du vanlegvis ikkje jobbar, for å hente inspirasjon. Bruk ulike teknikkar for idémyldring, og jobb saman med andre.
• Systematiser, snevre inn og konkretiser ideane. No kan de begynne å jobbe fram dei realistiske løysingane.
• Gjer grundig research. Snakk gjerne med nokon som har god kjennskap til temaet.

2 Produksjon

Førebuingar

• Dobbel- og trippelsjekk teknisk utstyr.
• Kva for filformat og tekniske kvalitetar krevst for å gjennomføre jobben?
• Finst det produksjonsrammer hos oppdragsgivar, som for eksempel ein designmanual?
• Førebu og prøv ut teknikkar for redigering i forkant, der det er relevant.
• Sjekk kva for lover og reglar som vedkjem produksjonen din. Det kan for eksempel vere åndsverklova, personvernlova, Ver varsam-plakaten, marknadsføringslova.
• Planlegg eventuelle opptak. Kva for verkemiddel og forteljeteknikkar skal du bruke i opptaka? Korleis sikrar du at du får nok råopptak? Kva for utstyr, innstillingar og omgjevnader treng du?

Innsamling

• Gjennomfør opptaksplanar eller planlagde intervju.
• Sjekk at alt fungerer både i innhald og teknisk før du avsluttar situasjonen for opptak og innsamling av innhald.
• Lag sikkerheitskopi av alt innhald.

• Lag dokumentstruktur på datamaskinen der du skil mellom arbeidsfiler og publiseringsfiler.

Redigering og etterarbeid

• Bruk relevante redigeringsprogram og funksjonar for redigering.

• Språkvask og faktasjekk: Ved bruk av kjelder, sjekk at du krediterer riktig. Dersom du har intervjua nokon, sørg for at du har stava namnet deira rett. Dobbelsjekk sentrale fakta, og sjekk rettskriving.

3 Publisering

Tidsfrister og respons

• Eksporter i riktig filformat og storleikar.

• Publiser til avtalt tid, slutt å flikke i tide.

• Kva er responsen? Gjer endringar og juster dersom det er mogleg og nødvendig.