Fagartikkel

Lys-mørk-kontrast

Kontrast mellom lyse og mørke fargar skapar spenning i ein komposisjon. Kontrasten mellom kvitt og svart gir den største kontrasten mellom lys og mørke. Med kulørte fargar blir gul-lilla rekna som den største lys-mørk-kontrasten.

Eit lite lyst felt som skil seg ut frå ein mørk bakgrunn. Illustrasjon.

Ulike fargar kombinerte med grått. Illustrasjon.

Fargeoppleving

Gråtonane mellom svart og kvit opplever vi ulikt, alt etter kva for fargar dei står saman med. Ein mellomgrå vil sjå mørkare ut saman med kvitt enn saman med svart. På same måte vil ein mellomblå farge verke lysare saman med mørke fargar og mørkare saman med lyse fargar.

Valør

Vi kallar gråtonane mellom kvit og svart for valørar. Dei ulike gråtonane har ulik lysheit.

Trinnvis inndeling av gråtonar mellom svart og kvitt. Illustrasjon.

Vi bruker også valør når vi beskriv lysstyrken i dei kulørte fargane. Lysheitsgraden i ein farge kan målast i forhold til gråtoneskalaen.

Gul er den lysaste fargen, og lilla er den mørkaste. Ved å blande inn kvitt eller svart endrar vi valøren i fargane og får ulike nyansar.

Grafikk av Munsells fargekart. Illustrasjon. — I den amerikanske målaren Munsells fargekart er nyansar med same valør plasserte på same nivå. Her ser du korleis vi bruker gråtoneskalaen til å bestemme lysheitsgraden i ein farge.

Lys-mørk-kontrast

Kontrasten mellom lys og mørk oppstår når lyse og mørke fargar blir plasserte saman. Dette kan du bruke til å skape spenning i ein komposisjon.

Ei kvinne i svarte klede og med svart hår sit. Ved sidan av står ei kvitkledd kvinne med raudoransje hår oppreist. Bakken er grøn, sjøen grå. Illustrasjon. — *To kvinner på stranden*, tresnitt av Edvard Munch, 1898.

Vi kan også bruke lys-mørk-kontrast til å skape djupneverknad. Ved å gjere fargane lysare innover i eit bilete kan vi skape ei kjensle av at noko er nært og noko anna er lenger unna.