Munnleg-praktisk oppgåve: Utforsk temaet religion og ytringsfrykt

Ein studie gjort av Irene Trysnes og Ronald Mayora Synnes ved Universitetet i Agder i 2021, viser at unge med minoritetsbakgrunn vegrar seg for å dele religiøst innhald på sosiale medium. Set dykk grundig inn i denne studien.

Les forskingsartikkelen "The Role of Religion in Young Muslims' and Christians' Self-presentation on Social Media" på Sage Publishing.

Klassen skal samarbeide om å utforske samanhengen mellom religiøs tilhøyrsel og ytringsfrykt i eige lokalsamfunn.

Om ønskjeleg, kan oppdraget gjennomførast som eit tverrfagleg prosjekt i faga medie- og informasjonskunnskap 2 og religion og etikk.

Førebuingsfasen

Som ei førebuing går gjennom elevane relevante ressursar i verktøykassa til NDLA, som handlar om forskingsmetode, forskingsetikk og rapportering.

Problemstilling

Kvar elev lagar utkast til ei problemstilling som undersøkinga skal klargjere, og presenterer denne for klassen.

Klassen vel deretter ut éi av desse problemstillingane som utgangspunkt for vidare utforsking.

Forskingsmetodar

For å klargjere problemstillinga skal de bruke tre ulike metodar:

• ei anonym, digital spørjeundersøking blant unge som tilhøyrer to ulike religionar / religiøse miljø

• ei kvalitativ intervjuundersøking der de intervjuar to eldre ungdommar som tilhøyrer ulike religionar / religiøse miljø

• ein grundig studie av datagrunnlaget som viser forholdet mellom religion og ytringsfridom i Fritt ord sin rapport frå 2021: Hva mener befolkningen om ytringsfrihetens grenser?

Gjennomføring

Læraren fordeler arbeidsoppgåver gruppevis. Her er ei liste over arbeid som må utførast:

• innhente løyve til å samle inn data

• førebu og gjennomføre spørjeundersøkinga

• laga intervjuguide og gjennomføre djupneintervju

• gjennomføre dokumentstudiet og hente ut relevant informasjon og datagrunnlag

• analysere data og setje dei funna som blir gjorde inn i ein teoretisk samanheng

• utarbeide og redigere forskingsrapporten

Hugs å innhente skriftleg løyve før spørjeundersøkinga blir gjennomført, og at informasjonen de får må behandlast konfidensielt (fortruleg), sidan det dreier seg om personlege opplysningar.

Diskuter til slutt dei funna de har gjort i samla klasse.

• Finst det ytringsfrykt blant religiøse ungdommar der de bur?

• Dersom ikkje, kva kan grunnen vere?

• Kvifor er ytringsfrykt eit demokratisk problem?

• Kva kan de gjere for å sikre at alle torer å ytre seg fritt?

• Kva lærte de av dette forskingsprosjektet?

Under "Relatert innhald" finn de nyttig rettleiing i korleis de kan gjennomføre eit tverrfagleg elevforskingsprosjekt.