Fagstoff

Korleis utføre ei marknadsundersøking?

For å drive ei vellykka bedrift må du kjenne kundane dine, konkurrentane dine og bransjen din. Marknadsundersøkingar krev at du stiller dei rette spørsmåla på den rette måten til dei rette menneska.

Forstørrelsesglass over en gruppe mennesker. Illustrasjon. — Gode marknadsundersøkingar gir bedrifta di ei retning. Dei hjelper deg med å følgje med på kva kundane vil ha, og kor mykje dei er villige til å betale for det.

Framgangsmåte

1. Definer målet for undersøkinga

Kva vil du vite om kundane eller marknaden din? Det første trinnet i ein marknadsundersøkingsprosess er å definere måla dine. Med andre ord: Kva er nøkkelinformasjonen du ønsker å avdekke?

Ved å først definere det du håper å finne ut, vil du kunne halde fokus og vere effektiv. Det kan til dømes avgjere om du skal lansere eit nytt produkt. Undersøkingsprosessen vil då avdekke om marknaden vil akseptere det nye produktet, og kor mykje dei er villige til å betale for det.

2. Lag spørsmål om marknaden, kundane og konkurrentane

Når du har identifisert målet, kan du utarbeide ei liste med spørsmål om marknaden, kundane og konkurrentane. Nokre døme:

Marknaden

Kva kjenneteiknar marknaden?
Korleis vil nærværet ditt påverke marknaden/kundane?
Har området du leverer til, ein stabil økonomi?

Kundane

Kven er målgruppa, og kva kjenneteiknar ho?
Kvar er dei?
Beskriv den ideelle kunden.

Konkurrentane

Kva er styrken til konkurrentane?
Kva er svakheitene deira?
Beskriv den typiske konkurrenten.

3. Informasjonsinnhenting

Vi kan innhente informasjon ved hjelp av informantar som svarer på ei marknadsundersøking. Nokre vanlege metodar for å innhente data er telefonundersøkingar, spørjeskjema på e-post, undersøkingar på nett og personlege intervju. Vi deler inn i kvalitativ og kvantitativ informasjon, som er informasjon som går høvesvis i djupna og breidda.

Kvalitativ informasjon

Den kvalitative informasjonen er meir undersøkande og involverer færre informantar enn i innhenting av kvantitativ informasjon. For å innhente kvalitativ informasjon bruker vi typisk fokusgrupper eller djupneintervju.

Kvantitativ informasjon

Innhenting av kvantitativ informasjon involverer mange informantar, og blir gjerne utført ved hjelp av spørjeundersøkingar.

Tips til verktøy for enkle marknadsundersøkingar

SurveyMonkey

Google forms

EasyQuest

Meiningsmåling på Facebook

4. Tolk og analyser funna

Eit av dei viktigaste trinna i marknadsundersøkingsprosessen er å tolke og analysere funna. Kva fortel undersøkinga deg? Ved å svare på dette spørsmålet vil du kunne få ei god forståing av det undersøkinga har avdekt.

Ha måla dine for undersøkinga i tankane mens du ser etter måtar du kan forbetre korleis du organiserer og grupperer dataa dine på. Dette vil gjere det lettare å komme til ein konklusjon etter kvart. Kva har du oppdaga?

Tips for organisering av data

Identifiser tendensar og trendar.
Vurder å bruke lister, tabellar, diagram og tankekart.
Nytt marknadsplanen din til å analyserer dataa dine for å kartlegge styrker, svakheiter, moglegheiter og truslar (ein klassisk SWOT-analyse).

5. Trekk konklusjonar og ta avgjerder

Hugs at du bør samanlikne alle konklusjonar med det innleiande målet for marknadsundersøkninga og dei overordna måla for verksemda. Gå over alle data du han hente inn og forsikre deg om at det ikkje er nokon hol. Vurder tendensar og problem innan industrien din / feltet ditt, analyser styrkane, svakheitene, moglegheitene og truslane. Nytt dataa til å ta avgjerder om marknadsinnsatsen din.

Fagomgrep

Informant: Ein person som svarer på ei marknadsundersøking.
Kvalitativ informasjon: Djuptgåande informasjon innhenta av relativt få informantar i til dømes fokusgrupper eller djupneintervju.
Kvantitativ informasjon: Breid informasjon innhenta frå mange informantar ved hjelp av til dømes spørjeskjema.
Respondent: I analysefasen av marknadsundersøkingar blir informanten kalla respondent.

Forbrukaråtferd og målgrupper