Fag

Oppgåve

Frå nasjonalromantikk til realisme

Vel eit utsnitt frå eit nasjonalromantisk måleri og gjer om motivet slik at det passar inn i realismen. Kva må du endre på? Korleis blir kontrasten mellom dei to kunsthistoriske periodane opplevd når du set dei to uttrykka saman?

Livet på ei seter. I for- og mellomgrunnen står og sit unge kvinner i bunad. Nokre er i samspel med kyr og geiter. I bakgrunnen er det storslåtte fjell. Illustrasjon. — Illustrasjon frå boka Norske folkelivsbilleder av Adolph Tidemand, utgitt av Chr. Tønsberg (Christiania, 1858).

Utstyr

gråblyantar
valfri fargeblyant
teikneblokk i A3-format

Del 1: Forarbeid

Sett deg inn i kva som kjenneteiknar nasjonalromantikken og realismen som periodar.
Vel eit nasjonalromantisk bilete og forklar kva for nasjonalromantiske trekk du finn i verket.
Skriv ut biletet i A3-format.

Del 2: Teikneoppgåve

Ta eit utsnitt av motivet og gjer det om til eit realistisk uttrykk.
Sjå kjenneteikn på dei to periodane i tabellen under.

Hovudforskjellar mellom nasjonalromantikken og realismen
	Nasjonalromantikken	Realismen
Fokus	nasjonalkjensle og identitet	kvardagsliv og samfunn
Motiv	historiske hendingar og idealisert natur	vanlege folk, daglegliv og sosiale forhold
Stil	kjensleladd og idealisert	skildre verkelegheita nøyaktig
Mål	vekke nasjonale kjensler	vise verda som ho er, og gjerne kritisere sosiale og politiske forhold

Bruk gråtonar saman med ein valfri farge og skap djupneverknad i teikninga di.
Monter det realistiske utsnittet ditt inn i det nasjonalromantiske verket.

Del 3: Presenter og vurder

Lag ei utstilling av arbeida saman med klassen.
Vurder kontrastane mellom nasjonalromantikken og realismen.
Korleis forandrar kunstuttrykka seg?
Forklar kort korleis du har gått fram for å forandre det utsnittet du valde, slik at det passar inn i den kunsthistoriske perioden realismen.