Oppgåve

Utfordringar i bedriftskulturen

I denne oppgåva skal de jobbe med utfordringar i etablerte bedriftskulturar. Set dykk inn i dei ulike casane nedanfor og diskuter moglege tiltak som kan forbetre situasjonen.

Denne sida er arkivert. Innhaldet kan vere utdatert.

Ung kvinne sit med hovudet i hendene, bøygd over ein kontorpult. På pulten står ein laptop. Foto.

Slik kan de jobbe med oppgåva

Jobb i grupper på to eller tre.
- Søk på internett for å finne døme på ulike bedriftskulturar.
- Bruk erfaringar frå praksisbedrift eller andre stader de jobbar eller har jobba.
Gå gjennom svara felles i klassen.
- Diskuter forbetringsforslaga.
- Reflekter over og diskuter kva rolle og kva ansvar de sjølv har for å skape ein god bedriftskultur.

Oppgåve

For kvar av casane nedanfor skal de

diskutere kva for utfordringar de ser i bedriftskulturen
diskutere korleis utfordringane i bedriftskulturen kan påverke kundar, gjester eller brukarar
skrive ned minst tre forslag til ulike tiltak som kan betre situasjonen

Case 1: Baksnakking og surmuling

Du trivst veldig godt i bedrifta du jobbar i. Samarbeidet med kollegaer og leiing fungerer bra. De har eit fint pauserom der dei som har pause samtidig, et lunsj saman.

I det siste har det vore noko surmuling på pauserommet og litt kviskring og baksnakking i gangane. Somme av dei tilsette er misnøgde med leiinga. Dei føler at dei verken blir høyrde eller sette når dei kjem med forslag til vidareutvikling av drifta eller hyggelege tiltak for dei tilsette.

Case 2: Avslag på kurs

Som medarbeidar går du til din nærmaste overordna i bedrifta og seier at du har lyst til å lære meir om leiing. Du får som svar at dette ikkje let seg gjere sidan det ikkje er pengar til kompetanseheving av tilsette i bedrifta.

Du diskuterer saka med kollegaene dine på pauserommet, og det er fleire som kunne tenke seg meir kursing og utdanning. Stemninga begynner å bli litt oppgitt.

Case 3: Sosialt press i og utanfor arbeidstida

Arbeidsmiljøet i bedrifta du jobbar i, er veldig bra. Bedrifta legg vekt på at dei tilsette skal bli godt kjende med kvarandre, trivst på jobb og ha det hyggeleg saman. Det blir nesten for mykje av det gode, for mange av aktivitetane er lagde utanom arbeidstida. Dette blir etter kvart eit problem for deg sidan du eigentleg har mest lyst til å vere med familie og venner på fritida.

Du kjenner på det sosiale presset, og er redd for å hamne utanfor dersom du ikkje stiller opp på alle arrangementa.

Case 4: Evig opplæring av nye tilsette

Du har i fleire år jobba i ei sesongbasert reiselivsbedrift i regionen din. Bedrifta har tilsette av mange ulike nasjonalitetar. Dei fleste reiser heim ved sesongslutt, og det er stor utskifting av tilsette mellom kvar sesong.

Kvart år kjem det nye medarbeidarar, og du kjenner på at du må bruke mykje tid på å lære dei opp, sjølv om dette ikkje inngår i arbeidsinstruksen din.

Det er òg store kulturelle forskjellar mellom dei tilsette. Du merkar at de ofte har ulikt verdisyn, og at språkbarrierar kan gjere kommunikasjonen utfordrande.