Profesjonell samhandling i helseservicefag

Tverrfagleg samarbeid i helseserviceyrka

Tverrfagleg samarbeid skjer både internt og eksternt. På arbeidsstaden samarbeider du med helsepersonell som til dømes legar, tannlegar, tannpleiarar, ambulansepersonalet, farmasøytar og sjukepleiarar. I tillegg møter du ei rekke eksterne samarbeidspartnarar. Dette kan inkludere tilsette i barnevernet, psykisk helse- og rustenester, bu- og omsorgsinstitusjonar og spesialistar innan ulike medisinske fagområde. Blant eksterne samarbeidspartnarar møter du òg servicemedarbeidarar som held ved like og reparerer medisinskteknisk utstyr. I tillegg kjem du i kontakt med ulike leverandørar av legemiddel, forbruksvarer og utstyr.

Dette mangfaldet av samarbeidspartnarar bidreg til å sikre ei heilskapleg og effektiv helseteneste. Derfor er det viktig å halde oppe profesjonell kommunikasjon mellom dei ulike yrkesgruppene.

Profesjonell kommunikasjon

Profesjonell kommunikasjon går føre seg både munnleg, gjennom fysiske møte og telefon, og skriftleg. Uansett kommunikasjonsform er det viktig å tilpasse språket til den faglege bakgrunnen til mottakaren. Viss du må bruke spesielle ord og uttrykk for å formidle bodskapen din, bør du forklare dei tydeleg for å sikre at mottakaren forstår.

For å sikre at dei som skal føre tenestene vidare, forstår informasjonen korrekt, må bodskapen vere klar og tydeleg. Ved skriftleg kommunikasjon er det viktig å vere kortfatta, sakleg og å bruke korrekt rettskriving. Hugs at du representerer bedrifta, derfor bør tonen vere både vennleg og profesjonell.

Profesjonell kommunikasjon inneber òg å skilje mellom å vere personleg og privat. Deling av private hendingar kan skape uvisse hos samarbeidspartnarar og føre til at du blir oppfatta som mindre profesjonell.

Kommunikasjon med kollegaer og samarbeidspartnarar krev sjølvinnsikt, aktive lytting og evna til å bygge tillit. Det inneber å forstå eigne kjensler og reaksjonar for å kunne handtere samtalar på ein konstruktiv måte. Å vere open, ærleg og vise interesse for perspektiva til andre fremmar tillit og samarbeid.

Aktiv lytting, som inneber å stille opne spørsmål og stadfeste det som blir sagt, er viktig for å unngå misforståingar. Kroppsspråk, tonefall og andre nonverbale signal speler òg ei stor rolle for korleis bodskapen blir motteke. Dette heilskaplege perspektivet bidreg til å styrke relasjonar og sikre eit godt samarbeid.

Fagleg bakgrunn

Det er viktig å tenke over fagbakgrunnen til dei vi kommuniserer med. To personar med bakgrunn frå same fagområde, som til dømes ein tannhelsesekretær og ein tannlege eller ein apotekteknikar og ein farmasøyt, kan bruke eit felles fagspråk. Når det gjeld yrkesgrupper med ulik fagleg bakgrunn, kan det vere nødvendig å tilpasse språket. Til dømes kan ein sjukepleiar og ein tannhelsesekretær bruke ulike faguttrykk, og det er viktig å tilpasse kommunikasjonen deretter.

Helsesekretær

Som helsesekretær har du ei rekke skriftlege og digitale oppgåver der du må bruke profesjonell kommunikasjon. Du dokumenterer og registrerer informasjon i pasientjournalar. Du kan òg vere ansvarleg for å skrive brev, møteinnkallingar og administrere inn- og utskrivingsprosedyrar. I tillegg registrerer du tilvisingar, bestiller undersøkingar og organiserer pasientreiser.

Den digitale kompetansen din er viktig, og du bruker digitale plattformer som Helsenorge for å sikre effektiv kommunikasjon både internt og eksternt. Via Helsenorge kommuniserer du med ulike yrkesgrupper som legar, sjukepleiarar, fysioterapeutar og farmasøytar for å koordinere behandling og oppfølging av pasientar. Dette kan innebere å sende eller få epikrisar, rekvisisjonar for prøvar og annan medisinsk informasjon på ein trygg og effektiv måte. Denne plattforma sikrar at nødvendig informasjon blir delt raskt og korrekt mellom dei som er involverte i behandlinga av pasienten.

Tannhelsesekretær

Som tannhelsesekretær har du variert samarbeid med ulike yrkesgrupper. I tillegg til å jobbe tett med tannlegar, tannpleiarar og tannlegespesialistar, kommuniserer du òg med fastlegar, sjukepleiarar, hjelpepleiarar, vareleverandørar og tilsette innan teknisk service og tannteknikk. Du har ansvar for å føre pasientjournalar, bestille varer og tolketenester og for å sende bekymringsmeldingar til barnevernet når det er nødvendig. Profesjonell kommunikasjon, både internt og eksternt, er avgjerande for å sikre at informasjonen blir delt korrekt og at arbeidsflyten er effektiv.

Apotekteknikar

Som apotekteknikar har du ei viktig rolle i kommunikasjonen med både kundar og helsepersonell. Du snakkar dagleg med legar, tannlegar, farmasøytar og anna helsepersonell for å sikre at pasientar får rett legemiddelbehandling. Du må kunne forklare kompleks informasjon om medisinar på ein enkel og forståeleg måte for kundar. Du har òg kontakt med legemiddelleverandørar når du koordinerer leveransar og bestillingar. Profesjonell kommunikasjon er avgjerande for å halde oppe korrekt behandling og vareta pasientsikkerheita.

Portør

Som portør har du ei viktig rolle i helsesektoren ved å transportere pasientar, medisinar, prøvar og utstyr på sjukehus. Du samarbeider tett med fleire yrkesgrupper, inkludert legar, sjukepleiarar, laboratoriepersonell og sjukehusprest, spesielt ved transport av avdøde pasientar. Elektroniske bestillingar og registreringar gir oversikt over transportoppgåvene, og profesjonell kommunikasjon er viktig for å utføre oppgåvene trygt og effektivt. Dette samarbeidet er avgjerande for pasientsikkerheit og god drift på sjukehuset.