Google Ads
Med Google Ads kan du oppnå auka trafikk på nettsida. Du betaler berre når brukarar har interaksjon med annonsen din, til dømes når dei klikkar på annonsen eller ringjer til bedrifta di.
Annonsar hos Google Ads når fram til kundar ved at dei blir plasserte i søkjeresultat i Google. Det er tre grunnleggjande annonse- og kampanjetypar:
Kampanjar i søkjenettverket: Tekstannonsar som kan visast i Google sine søkjeresultatsider når nokon søkjer etter produkt eller tenester som har likskapstrekk med dei du tilbyr
Kampanjar i displaynettverket: Biletannonsar som blir vist på nettstadane og i appane kundane dine besøkjer, til dømes på VG
Videokampanjar: Videoannonsar med ei varigheit på seks eller femten sekund, som blir spelte av like før eller midt i YouTube-innhald
I Google Ads kan du bruke målretting for at annonsen din skal bli sett av bestemte typar menneske eller i bestemte samanhengar eller innhaldstypar. Du kan til dømes målrette annonsen mot personar som har besøkt nettstaden din. Ei slik målretting blir kalla remarketing og blir brukt for å få personane tilbake til nettstaden for å fullføre ei bestilling.
Remarketing må brukast målretta, slik at du ikkje spammar folk med annonsen din. Du bør også bruke capping, som er ein funksjon som avgrensar kor ofte den same brukaren ser ein annonse i Google. Sel du eit produkt som kunden vanlegvis berre kjøper éin gong, bør du ikkje bruke remarketing til kundar som allereie har kjøpt produktet. I verste fall kan dette føre til ei fiendtleg innstilling mot merkevara.
Du kan også angi søkjeord eller emne for at annonsen din skal bli sett av personar som sannsynlegvis er interessert i bestemte produkttypar, til dømes sykkelrelaterte produkt. For å nå bestemte typar menneske kan du målrette annonsen mot ulike demografiske grupper, bestemt til dømes ut frå kjønn, sivilstatus, barn, interesser og bustad.
Google gir deg rapportar, statistikk og tips, slik at du kan utvikle annonsekampanjen til å bli stadig meir treffsikker.
Vil du lese meir, gå til Google si side om Google Ads.