Førstehjelpsutstyr

Krav og retningslinjer for førstehjelpsutstyr

Alle arbeidsplassar skal ha førstehjelpsutstyr som gjer det mogleg å gi rask hjelp ved skadar eller akutt sjukdom. Arbeidsgivar har ansvar for at utstyret er tilpassa den typen arbeid som blir utført der, talet på tilsette og risiko på arbeidsplassen.

Førstehjelpsutstyret skal vere lett tilgjengeleg, tydeleg merkt og plassert slik at det raskt kan brukast ved behov. Det må jamleg kontrollerast at innhaldet er komplett og i god stand.

Arbeidsgivar skal òg sørge for at dei tilsette veit kvar utstyret er, og for at dei får opplæring i korleis det blir brukt. Det er tilrådd at fleire personar har ansvar for å kontrollere og halde ved like førstehjelpsutstyret jamleg for å sikre at det fungerer som det skal.

Førstehjelpsutstyr

På bakgrunn av risikoforholda på arbeidsplassen bør arbeidsgivar vurdere om det er nødvendig med ekstra førstehjelpsutstyr, og i tilfelle kva slags. Arbeidsplassar med lang avstand til medisinsk hjelp kan trenge meir omfattande utstyr enn andre.

Innhald i førstehjelpsskrin/førstehjelpskoffert

• ulike bandasjar, kompressar, kirurgisk teip, plaster og sårserviettar til behandling av kutt og sår

• trekanttørkle (fatle) til avlasting ved brot

• sikringsnåler, saks og pinsett

• elastisk bind 10 cm x 5 m

• munn-til-munn-maske (med ventil eller filter)

• eingongshanskar

• augeglas og saltvassløysning

• brannbandasje, til dømes 5 cm x 15 cm

• kuldepakning

• kort rettleiing i førstehjelp

• EpiPen

Hjartestartar

Ein hjartestartar blir brukt saman med hjarte- og lungeredning (HLR) ved hjartestans. Apparatet analyserer hjarterytmen og gir tydelege instruksjonar med tale og bilete. Viss det er behov for straumstøyt, viser hjartestartaren korleis du skal gjere det. Du skal alltid ringe 113, starte HLR og følge rettleiinga frå både nødsentralen og hjartestartaren. Hald fram med HLR til personen viser teikn til liv eller hjelpa kjem. Hjartestartarar kan òg brukast på barn – bruk barneelektrodar eller barnemodus dersom det finst.

Det bør opprettast rutinar for bruk, vedlikehald og opplæring knytte til hjartestartaren, slik at alle som kan komme til å bruke apparatet, veit korleis det skal handterast, oppbevarast og kontrollerast regelmessig.

Oksygenutstyr

Det finst oksygenapparat som er enkle og trygge å bruke i nødssituasjonar der det er behov for utstyr til assistert pusting. Slike apparat kan vere ein del av førstehjelpsutstyret, spesielt på stader der det kan ta tid før profesjonell hjelp kjem. Dei gir eit tilskot av oksygen som kan vere avgjerande ved pustevanskar eller medvitsløyse.

Pulsoksymeter

Eit pulsoksymeter måler puls og oksygennivået i blodet. Det blir brukt for å vurdere pust og sirkulasjon og gir rask informasjon om oksygentilførselen i kroppen. Pulsoksymeteret er eit nyttig hjelpemiddel ved førstehjelp og andre situasjonar der overvaking av oksygenmengda i blodet er viktig.