Debatt om interessekonfliktar
1. Førebuing til debatt
I debatten skal de ta utgangspunkt i følgande problemstilling: Korleis bør areala ved og i Repparfjorden brukast i framtida?
Rolleinndeling
Vel ein eller to elevar som kan vere debattleiarar.
Resten av klassen blir delt inn i grupper som representerer forskjellige aktørar/roller:
gruveselskap
reindrift (samiske interesser)
fiskerinæring
naturvernorganisasjon
kommune/stat
lokalbefolkning
Tilpass talet på elevar per gruppe etter klassestorleiken.
Finn argument
Set dykk inn i saka som har skapt interessekonflikt om Repparfjorden, og finn aktuelt innhald for aktøren dykkar. Hugs at de argumenterer ut frå rollene og ikkje ut frå eigne meiningar.
Nokre stikkord som kan vere til hjelp for å komme i gang: fisk vs. kopar, gruveavfall, samiske rettar, økonomi, arbeidsplassar, miljø, naturinngrep, grønt skifte, befolkning, fråflytting, berekraft, ressursutnytting, arealbruk, levekår, distriktspolitikk.
Kvar gruppe skal finne
minst tre argument
minst to fagomgrep som de bruker rett
eitt konkret døme frå området (kart, naturforhold, næring eller rett)
Lag eit kort startinnlegg (maks to minutt) der de
presenterer aktøren dykkar
forklarer hovudinteressene dykkar
grunngir standpunktet dykkar
Debattleiarane lagar ein plan for gjennomføring av debatten (sjå forslag til struktur i boksen nedanfor).
2. Gjennomføring av debatt
Debatten blir styrt av debattleiaren/debattleiarane og følger desse reglane:
De argumenterer ut frå rolla dykkar og ikkje ut frå eigne meiningar.
Bruk fagomgrep der det er naturleg.
Vis respekt for andre aktørar.
Grunngi meiningane dykkar.
Bruk signal for innlegg og replikk.
Forslag til struktur på debatten
Startinnlegg
Kvar gruppe presenterer innlegga sine (maks to minutt kvar).
Debatt
Gruppene utfordrar kvarandre og grunngir eigne argument.
Kva kan vere ei mogleg løysing? Prøv å finne kompromiss. Kva kan gruppene vere einige om? Kva er gruppene ueinige om?
Avslutning
Kvar gruppe held eit sluttinnlegg på cirka eitt minutt.
3. Etterarbeid: individuell refleksjon
Denne delen kan gjennomførast skriftleg eller munnleg.
Reflekter over interessekonflikten om Repparfjorden og svar på spørsmåla nedanfor. Ta utgangspunkt i debatten, fagstoffet og eigne meiningar.
Kva for ulike interesser finst i området?
Kva interesser står spesielt mot kvarandre?
Kven vinn, og kven taper på ulike val?
Vel to av desse:
Kva interesser bør vege tyngst, og kvifor?
Kva for realistiske løysingar finst i saka?
Kva seier konflikten om ressurs- og arealbruk i nordområda?
Kva for liknande saker finst andre stader?