Redusere ulikskap i og mellom land

Forskjellene mellom fattige og rike land har blitt mindre. Til gjengjeld har forskjellene innad i mange land blitt større. […] FNs bærekraftsmål har satt seg som mål at de fattigste 40 prosent av verdens befolkning skal oppnå en større inntektsøkning enn gjennomsnittet i befolkningen. Utdanning, skatt, bedre sosiale ordninger og fagorganisering er områder som vil stå sentralt. Det vil bli en stor utfordring i en verden hvor penger og politisk makt henger tett sammen.
(Lars Andreas Loe i intervju med Norad, sjå Norad, 2016)

I denne oppgåva skal de bruke metoden 1 + 1 = 3 til å kome på idear til korleis vi kan nå FNs berekraftsmål nummer 10.

• tid: 20 minutt
• føremål: finne løysingar som kan bidra til å jamne ut forskjellane i verda

Instruksjon

1. Gå saman i grupper på fire eller fem elevar.
2. Vel éin i gruppa til å notere.
3. Individuelt: Les om FNs berekraftsmål nummer 10 i boksen under.
4. I gruppa: Diskuter kva de tenkjer at dette målet betyr og inneber.
5. I gruppa: Vel dykk ut eit land, og bruk 8–10 minutt på å skrive ned idear de kjem på som kan bidra til å jamne ut forskjellane i landet. Hugs at alle forslag er like verdifulle. Ingen idear er dumme. Det er ikkje lov å seie «nei». Alt er mogleg! No er det om å gjere å få fram så mange idear som mogleg.
6. Bruk 2 minutt på å bli samde om kva for to forslag de har lyst til å dele med klassa.
7. Gruppene får 1–2 minutt kvar til å presentere dei to forslaga sine for klassa. Sei først kva land de har fokusert på, før de fortel om forslaga dykkar.
8. Lag ein plakat (digitalt eller på papir) med bilete frå landet «dykkar» og forslaga dykkar til korleis forskjellane kan jamnast ut, og kva det kan ha å seie for innbyggjarane i landet.

Refleksjon i fellesskap

• Kvifor er det så store forskjellar i verda?
• Kva vil det bety for oss å jamne ut forskjellane?
• Kva kan vi som medmenneske bidra med?
• Kva har du lært av denne oppgåva?