Profesjonelle nettverk

Relasjonar og kontaktar som blir utvikla med andre fagfolk, bedrifter, organisasjonar eller enkelpersonar i bransjar eller yrkesliv, kallar vi profesjonelle nettverk. Desse nettverka kan bestå av kollegaer, mentorar, forretningspartnarar, kundar, leverandørar, investorar og andre som kan bidra til karriereutvikling eller bedriftsvekst. Formålet med profesjonelle nettverk er å utveksle informasjon, få tilgang til nye mogelegheiter, få råd og støtte og dessutan dele ressursar og erfaringar.

Det er tidkrevjande å bygge nettverk, og det er like viktig å halde kontakten med dei etablerte kontaktane som det er å etablere nye. Du kan vise interesse for arbeidsfeltet ditt ved å dele relevante artiklar, stillingsutlysingar, eventar og arrangement med nettverket ditt. Kanskje du hjelper andre med å finne ein jobb? Bidra med det du kan, det kan du få igjen for sjølv også.

Viss du som elev driv ungdomsbedrift, får du tilgang til nettverk gjennom Ungt Entreprenørskap. I tillegg er det å starte og drive ungdomsbedrift eit godt høve til sjølv å arbeide med profesjonelle nettverk. Der kan du hente kompetansen du treng for å utvikle bedrifta, skaffe ressursar, rettleiing og mogelegheiter som kan hjelpe bedrifta å vekse. Ungt Entreprenørskap tilbyr ulike arenaer der du kan bygge nettverk, som mellom anna mentorordning og meisterskap.

Hovudfunksjonar ved profesjonelle nettverk

Informasjonsdeling

er tilgang til oppdatert informasjon om bransjen, marknadsutviklingar, nye teknologiar og beste praksis. Gjennom nettverket kan du lære av andre sine erfaringar og unngå vanlege fallgruver.

Karriereutvikling

er hjelp med å utvikle karrieren ved å opne dører til jobbmoglegheiter, samarbeid og forfremmingar. Mange jobbar og karrieremoglegheiter blir formidla gjennom personlege kontaktar i staden for tradisjonelle tilsetjingsprosessar.

Mentorskap og rettleiing

er når mentorar gir råd, rettleiing og støtte. Mentorar kan hjelpe deg med å utvikle ferdigheitene dine, setje mål og navigere gjennom utfordringar i karrieren.

Forretningsutvikling

er å utvikle forretningsmoglegheiter. Dette inkluderer å finne partnarar, kundar, leverandørar eller investorar som kan hjelpe bedrifta di å vekse.

Samarbeid og partnarskap

inneber å finne potensielle samarbeidspartnarar for prosjekt, eller andre forretningsinitiativ. Samarbeid med andre bedrifter eller fagfolk kan føre til innovasjon og vekst.

Støtte og ressursar

gir deg emosjonell støtte, praktiske råd eller tilgang til ressursar som kan hjelpe deg med å handtere utfordringar i arbeidslivet.

Korleis bygge og halde ved like eit profesjonelt nettverk?

• Ver proaktiv
  Sørg for å delta på relevante bransjemøte, konferansar, workshops og nettverksarrangement.

• Bruk sosiale medium
  LinkedIn er ei av dei mest brukte plattformene for å bygge og halde ved like profesjonelle nettverk.

• By på din eigen kunnskap
  Del ekspertisen din og tilby å hjelpe andre. Dette skaper gjensidig nytte og styrker relasjonane.

• Følg opp
  Hald kontakten med nettverket ditt gjennom jamlege oppdateringar, møte eller meldingar.

• Ver ærleg og autentisk
  Autentiske relasjonar er ofte dei mest varige og fruktbare.

I filmen nedanfor kan du høyre Jenny Skavlan, Eirik og Axel i Tise fortelje om korleis dei har brukt nettverka sine for å etablere Tise.

Ledernettverk

I eit leiarnettverk kan du få fagleg påfyll som leiar gjennom erfaringsutveksling og ulike kurs. Virke, hovudorganisasjonen i handels- og tenestenæringa, er éin av fleire aktørar som tilbyr nettverk for leiarar.

Bransjenettverk

Medlemsorganisasjonar som Virke og NHO tilbyr medlemmene sine å bli med i ulike nettverk etter bransje. Til dømes har Virke mellom anna eit nettverk for salsleiing, og NHO Service og Handel har ulike nettverk for bemanningsbransjen.

Det finst òg mange ulike frittståande bransjenettverk som bedrifter kan melde seg inn i, som til dømes SRF (Salgs- og Reklameforeningen i Bergen).

Bransjenettverk arranger ulike kurs, samlingar og konferansar som medlemmene kan delta på. På denne måten kan ein styrke sin eigen faglege utvikling og kompetanse, samtidig som ein vidareutviklar bedrifta si.

Næringsklynger

Ei næringsklynge er eit nettverk av små og store bedrifter, som oftast innan same bransje. I nokre klynger flytter bedriftene kontora sine til éin kontorfellesskap, mens andre samarbeider utan å vere samlokaliserte. Innovasjon Norge er ein aktør som startar opp nye klynger for å få fart på samarbeidsbaserte utviklingsprosjekt.

I ei næringsklynge samarbeider bedriftene vanlegvis tettare enn i eit bransjenettverk. Næringsklynger består ofte av aktørar frå ulike delar av bransjen, som til dømes entreprenørar, industri, offentlege aktørar, forsking og utvikling. Ønsket er å styrke evna til samarbeid og innovasjon.

Eit døme på ei næringsklynge er Eyde-klynga i Agder. Visjonen deira er

å sikre tilvekst og konkurransedyktig norsk prosessindustri som opererer innenfor naturens tålegrense. I fellesskap streber vi etter at bedriftene skal gi positivt bidrag tilbake til samfunnet og naturen.

Andre formar for klyngesamarbeid er hub og tankesmie, også kalla tankesmie. Her samlast bransjar og næringar i små fellesskapar for å generere tankeprosessar om framtid og utvikling. Hub blir ofte brukt som ein arbeidsfellesskap for oppstartsbedrifter.