Marknadskommunikasjon som konkurransemiddel

Marknadskommunikasjon dreier seg, enkelt forklart, om overføring av ein marknadsføringsbodskap frå ei verksemd til ein mottakar.

Ordet kommunikasjon kjem frå det latinske ordet «communicare», som betyr «å dele med andre, gjere felles, kunngjere». I marknadsføringssamanheng ønskjer vi å gjere felles eller kommunisere ein marknadsføringsbodskap om ein vare, ei teneste, ein idé eller ei haldning.

Marknadskommunikasjon handlar om at ei verksemd kommuniserer med målgruppene sine. Det kan vere utfordrande for verksemder å skaffe seg merksemd, nå ut til og byggje relasjonar til målgrupper i eit medielandskap i stadig endring.

Formålet med marknadskommunikasjon kan mellom anna vere å skape tillit og kjennskap til produkt og verksemd, informere om produkteigenskapar og motivere til kjøp.

Det er viktig at all kommunikasjon ut mot målgruppa er godt planlagd og formidlar det verksemda og produkta står for.

Marknadskommunikasjon kan vere både personleg og ikkje-personleg. Når ein butikktilsett vender seg til deg i ein butikk, er det eit døme på personleg marknadskommunikasjon.

Ein reklamefilm er eit døme på ikkje-personleg marknadskommunikasjon, som òg kan kallast massekommunikasjon.

I den relaterte artikkelen nedanfor kan du sjå ein animasjon om marknadskommunikasjon. I animasjonen blir nemninga p for påverknad nytta. Kommunikasjonsprosessen blir òg belyst.