Fagstoff

Installere Windows Server 2022

Denne guiden går gjennom installasjonsprosessen for Windows Server 2022 og korleis du kan finne og installere nødvendige drivarar.

Denne guiden startar med det første steget i installasjonsrettleiaren til Windows Server 2022. Dette kjem du til automatisk når du startar opp datamaskina med eit installasjonsmedium (cd/dvd/USB-minnepenn/ISO-fil) som inneheld Windows Server 2022.

1. Vel språk og tastaturoppsett

Bruk nedtrekksfelta for å velje rett tidsformat og tastaturoppsett. Trykk på "Next" for å gå vidare.

Vindauge med Microsoft-logoen og moglegheiter for å velje språk, tidsformat og tastaturoppsett. Skjermutklipp.

2. Start installasjon

På neste skjermbilete trykker du på "Install now".

Vindauge med Microsoft-logoen og vala "Install now" og "Repair your computer". Skjermutklipp.

Valet "Repair your computer" gir tilgang til diverse verktøy på installasjonsmediet som kan brukast for å reparere eller få tilgang til ein skadd Windows Server-installasjon.

3. Vel serverversjonen som skal installerast

Windows Server finst i fleire versjonar. Windows Server 2022 Standard (Desktop Experience) er den versjonen som er mest aktuell for dei fleste laboppsett. Han har eit grafisk brukargrensesnitt og har dei aller fleste funksjonane som Windows Server tilbyr. Etter at du har valt versjonen du ønsker å bruke, trykker du på "Next".

Vindauge med liste over dei forskjellige versjonane av Windows Server som kan veljast. Windows Server 2022 Standard Desktop Experiance er vald. Skjermutklipp.

4. Aksepter lisensvilkår

Du vil no få opp lisensvilkåra for programvara. Du må krysse av for "I accept the license terms" og trykke på "Next" for å gå vidare.

5. Vel installasjonstype

For å ha full kontroll over installasjonen av ein ny serverinstallasjon tilrår vi at du vel "Custom: Install Windows only (advanced)".

Vindauge med to hovudval: anten oppgradere tidlegare installasjon eller avansert installasjon. I boksen for oppgradering står det følgande: "Upgrade: Install Windows and keep files, settings, and applications. The files, settings, and applications are moved to Windows with this option. This option is only available when a supported version of Windows is already running on the computer." I boksen for avansert installasjon står det følgende: "Custom: Install Windows only (advanced). The files, settings, and applications aren't moved to Windows with this option. If you want to make changes to partitions and drives, start the computer using the installation disc. We recommend backing up your files before you continue." Skjermutklipp.

6. Slett eksisterande partisjonar

For installasjon på server med fleire harddiskar

Dersom du skal installere på ein server som har fleire tilkopla harddiskar, vil dei forskjellige harddiskane identifiserast som "Drive 0", "Drive 1" og så vidare i lista. Du vil òg kunne sjå alle partisjonane som er på kvar av diskane.

Vi tilrår at du ber læraren din om hjelp eller eventuelt sjekkar ein ekstra gong sjølv at du slettar partisjonar frå rett harddisk (den harddisken du ønsker å installere operativsystemet på).

For installasjon på virtuell maskin

Dersom du installerer Windows Server på ei virtuell maskin, til dømes gjennom VirtualBox eller Hyper-V, vil du neppe få opp eksisterande partisjonar på den virtuelle harddisken.

Du får då opp "Drive 0 Unallocated Space" med heile harddiskplassen ledig. Gå då vidare til neste steg.

Dersom ingen harddisk kjem fram i lista

Installasjonsrettleiinga til Windows gjer eit søk etter tilgjengelege harddiskar. Dette gjer ho ved hjelp av enkle standarddrivarar. Harddiskar som er kopla til RAID-kontrollarar, ekspansjonskort eller SCSI-harddiskar (som er vanleg i servermaskinvare), vil ikkje nødvendigvis dukke opp i lista.

Finn drivarane til lagringskontrollaren. Dette er ofte hovudkortdrivarar. Last dei inn ved hjelp av valet "Load Driver". Når drivaroppstarten er fullført, vil lista bli lasta inn på nytt.

Dersom du ikkje installerer på servermaskinvare og ingen harddisk er synleg, kan det vere at harddisken ikkje er kopla til hovudkortet på rett måte. Snakk med læraren din før du går vidare.

Ved reinstallasjon av Windows

Dersom du installerer Windows Server på ei maskin som har hatt andre installasjonar tidlegare, er det sannsynleg at gamle partisjonar framleis eksisterer på harddisken til maskina. Vel kvar partisjon etter tur og vel "Delete". Du vil få opp eit vindauge der du må stadfeste slettinga.

Vindauge som viser ei liste med overskrifta "Where do you want to install Windows?". Lista viser eksisterande partisjonar på harddisken. Under er det val som å slette og formatere. Skjermutklipp.

Når slettinga er ferdig, skal du berre stå igjen med ei linje med namnet "Drive 0 Unallocated Space" med heile diskstorleiken som ledig.

Liste med overskrifta "Where do you want to install Windows?" og berre éi linje. På den står det "Drive 0 Unallocated Spare, Total size 238,5 GB, Free space 238,5 GB". Skjermutklipp.

Dersom du har ei datamaskin med fleire harddiskar, vil dei andre diskane og partisjonane òg visast.

7. Opprett ny partisjon

For å opprette ein ny partisjon på den tomme harddisken trykker du på "New". No kan du skrive inn storleiken du ønsker at den nye partisjonen skal ha.

Vi tilrår at partisjonen du lagar, berre er rundt halvparten av totalstorleiken på harddisken. Då kan du lage ein eigen partisjon for delte mapper og liknande seinare.

Når du har valt storleiken, trykker du "Apply" for å starte opprettinga av partisjonen.

Vindauge som viser at den eine tilkopla harddisken er tom. Nedst er felt for å bestemme storleiken på ein ny partisjon. Skjermutklipp.

"Drive 0 Unallocated Space" er gitt i talet på GB som er ledig. Når du lagar ein ny partisjon, blir MB brukt som storleik. Du må derfor gjere ei omrekning.

Ein sprettoppmeny vil no dukke opp og spørje deg om tillating til å opprette andre nødvendige partisjonar for Windows-installasjonen. Vel "OK".

Sprettoppmeny som ber om tillating til å opprette andre partisjonar som er nødvendige for installasjon. Skjermutklipp.

Når maskina har fått arbeidd seg gjennom opprettinga av partisjonane, vil partisjonslista oppdatere seg. Du vil sjå tre små partisjonar, éin stor partisjon og ei linje som beskriv kor mykje plass som er ledig (upartisjonert) på harddisken. Marker den store partisjonen, som er av typen "Primary". Trykk så på "Next" for å starte installasjon av denne partisjonen.

Liste med fire partisjonar, tre som er mellom 16 MB og 500 MB, og éin stor partisjon for installasjon av operativsystem. Ei linje med restplass på harddisken er også vist. Skjermutklipp.

8. Følg installasjonen

Installasjonsrettleiaren vil no starte sjølve installasjonen av Windows Server. Det kan ta ein halvtime eller meir å gjennomføre installasjonen.

Vindauge som viser framgangen i installasjonen. Det står: "Copying Windows Files 100 prosent. Getting files ready for installation. Installing features. Installing updates. Finishing up." Skjermutklipp.

Når installasjonen er ferdig, vil installasjonsrettleiaren automatisk køyre ein omstart av datamaskina. Då er det lurt å fjerne installasjonsmediet (USB-minnepenn, ISO-fil, cd/dvd-plate). Det sikrar at maskina startar opp ved hjelp av harddisken og ikkje startar installasjonsrettleiinga på nytt.

Vindauge som tel ned sekund til automatisk omstart. Skjermutklipp.

Dersom installasjonsrettleiaren startar på nytt

Dersom du ikkje var rask nok med å fjerne installasjonsmediet frå maskina, får du opp skjermbiletet som er vist i steg 1 av denne guiden. Dette er ikkje så farleg.

Avslutt installasjonsrettleiaren ved å trykke på krysset i høgre øvre hjørne. Stadfest at du vil avslutte installasjonen. Datamaskina vil så starte opp på nytt, og du kan ta ut installasjonsmediet.

Dersom du får feilmeldinga "Operating system not found"

Datamaskina sin BIOS/UEFI har ei oppstartsliste med alle lagringseiningar som operativsystemet kan starte opp frå. Dersom harddisken du har installert Windows Server til, ikkje er i denne lista, vil du få opp denne feilen.

Gå inn i BIOS/UEFI og legg til harddisken under oppstartsrekkefølge (Boot Order, Boot Priority eller Boot Options).

9. Lag administratorbrukar

Under første oppstart av Windows Server vil du bli beden om å setje passord på administratorbrukaren til maskina.

Vindauge med felt for å skrive inn passord og gjenta passord for administratorbrukar. På ein knapp i høgre hjørne står det "Finish". Skjermutklipp. — Eit godt passord er viktig for alle brukarar, men det er spesielt viktig for administratorar.

For skulelab kan det vere fornuftig å dokumentere administratorpassordet. Vel då eit passord som du ikkje bruker nokon annan stad.

I ekte driftsmiljø bør slike passord aldri skrivast ned med mindre sikkerheita er ivareteken og det er heilt nødvendig.

Når administratorbrukaren er laga, vil operativsystemet bringe deg til påloggingsvindauget. For å logge på må du første trykke inn tastane Ctrl + Alt + Delete samtidig. Då vil du få eit påloggingsvindauge der du kan logge på med brukaren "Administrator".