Soppriket

Sopp er eukaryote organismar som tidlegare blei plasserte saman med plantane. Sopp og plantar har fellestrekk som at dei formeirar seg ved hjelp av sporar, og at dei er fastsitjande (urørlege).

Soppane har òg cellevegg, men han består av kitin – og ikkje av cellulose, som hos plantane. Seinare blei soppane plasserte i eit eige rike, sidan dei strengt teke ikkje er i slekt med plantane.

Sidan sopp ikkje kan drive fotosyntese, må dei ta opp organiske sambindingar via andre organismar. Vi seier at soppane er heterotrofe.

Mange av soppane skaffar seg næring ved å bryte ned døde plantar eller ved å leve i symbiose med andre organismar. Dei tek opp flytande næring ved diffusjon gjennom den ytre overflata, sidan fordøyinga skjer på utsida av kroppen.

I tillegg til at sopp til liks med dyr er heterotrofe, har dei òg andre fellestrekk med dyr. Både sopp og dyr har glykogen og feitt som opplagsnæring – og aldri stivelse, som hos plantane.

Lav (uekte soppar) blir til tider plassert i soppriket, sjølv om lav består av fleire organismar frå ulike rike. Grunnen til denne plasseringa er at lav alltid har sopp som hovudkomponent, men denne lever i symbiose med grønalgar eller cyanobakteriar.

Lav blir delte inn i tre hovudgrupper basert på korleis dei veks:

• busklav (til dømes reinlav)
• bladlav (til dømes neverlav)
• skorpelav (til dømes kartlav).