Kva er universell utforming?

I Noreg blir denne definisjonen på universell utforming brukt
Universell utforming er forming av produkt, bygg, transportmiddel og omgjevnader på ein slik måte at dei kan brukast av alle menneske, i så stor grad som muleg, utan behov for tilpassing eller spesiell utforming.

Innanfor boligsektoren inneber dette at ein ved nybygging, rehabilitering og ombygging skal vektlegge at både bueiningar, fellesområde og uteareal skal vere brukbare for eit vidt spekter av menneske: barn, eldre, synshemma og funksjonshemma, i tillegg til spreke 20-åringar.

Småbarnsforeldre skal kunne ta med seg barn i barnevogn, og ukjende besøkande skal kunne finne fram. Dette skapar bustadområde som er brukbare for fleire og enklare for mange, ved hjelp av tiltak som er nødvendige for nokon.
Kjelde: Husbanken

Når menneske har nedsett funksjonsnivå eller helseproblem, kan dette føre til at dei møter hindringar i kvardagen som gjer livet vanskelegare. Eit grunnprinsipp for universell utforming er at omgjevnadene og produkt har ei utforming som gjer dei tilgjengelege for flest muleg. Målet er å forenkle livet og auke livskvaliteten for alle.