Nils Mattias Andersson
Nils Mattias Andersson, Næjla Maahke voerhtjen 25.b. 1882 reakasovvi Maersievallesne, Vualtjarisnie jïh tsïengelen 22.b. 1974 Mellansjö:esne, Dearnesne sealadi. Dïhte båatsoesaemie Ryfjell Umbyn, Dearnesne. Jaepien 1919 Næjla Maahke, Anna Sofia Zakrisdotterinie pruvri. Dah guaktah 6 maanah åadtjoejigan.
Åvlavuelien råantjoeh
Næjla Maahken vuelie Åvlavuelien råantjoeh gellie motijvh åtna. Dïhte Åvlavuelie-vaerien jïh eatnemen bïjre joejki, men ij ajve vaerien bïjre, aaj mah desnie guktie vaerie, jaevrie, speatnoe jïh sïelke, ealoe jïh almetjh mah desnie jielieh.
Næjla Maahke sov jielemen bïjre joejki, dïhte ålma, sov gåmma, dej maanah, ealoe, vaerien speatnoe jïh sïelke, mojhtese mij jamhkele.
Vuelien sisvege
Vuelien sisvege åenehkslaakan soptsestamme: Ålma sov ealoem bijjene vaeresne ryöjnesje jïh vuajna guktie sov gåmma Aanna, gåetesne speatnoen nuelesne, dållem nastehte jïh båssa. Jaevresne Aanna göölie jïh dah maanah guelijste viermine bïllijieh. Maanah buerebe bovtsh Åvla-vuelesne lyjhkieh. Dellie ealoem gellie ovmessie baakoejgujmie buerkiestieh, staalehke, tjuesehke, jovjehke, skuallehke, raantehke, saelhtehke, samhtjehke. Åvla-vuelien speatnoe jallh sïelke lea veerehks jïh bovtsh njammeme. Bovtsh desnie gaatoelieh.
Daate lea mojhtese-joejke jïh Næjla Maahke jeehti:, dïhte sïjhti sov testameentem vedtedh.
Dïjre
Næjla Maahke dïjrem sov gïeline buakta. Dïhte baakoeh nuhtjie mah maehtebe ovmese vuekine toelhkestidh. Baakoem njammedh, baakoegærjesne ‘die, patte; suge opp (fuktighet, om ved) pråvhka raajesinie “Men, Åvlavuelien stoerre sielke, sielke - stoerre sielke - njammeme mov stoerre kranna raanhke - raanhke, raanhke, raanhke”. Næjla Maahke buerkeste gusnie sov ealoem gaatoeli. Ealoe Åvlavuelien stoerre sïelken sïjse gaatoeli.
Guktie jåhta
Joejke gievline jårra. Næjla Maahke såemies baakojde gellien aejkien joejkeste. Kaanne tuhtjie dah baakoeh joekoen vihkeles jallh kaanne dïhte ussjede mearan seamma baakoem joejkeste mejnie edtja jåerhkedh. Joejke tïjjen mietie jåhta jïh minngemes Næjla Maahke voereståvva. Jïh dïhte lea sov mojhtesi bïjre joejkestamme. Joejken aalkovisnie Aanna tjahkesje dållem nastehte jïh joejken minngiegietjesne dellie viht Aanna tjahkesjeminie dållem nastehte. Joejke jårra.