Kva er matsvinn?
Styresmaktene definerer matsvinn som «mat som vert kasta, men som på eit tidspunkt kunne eller skulle ha vore eten av menneske, til forskjell frå uunngåeleg matavfall som bein, skal, produksjonsrestar og liknande».
Mål om å redusere matsvinn
No har styresmaktene og matbransjen skrive under ein avtale om å redusere svinnet av mat. Initiativet skal medverke til å redusere miljø- og ressursproblema knytte til matsvinn i Noreg og fremje ei betre utnytting av maten.
Fakta om matsvinn
Kvar og ein av oss kastar i snitt 42,6 kilo mat i året – omtrent kvar femte berepose vi fyller opp og tek med heim, ifølgje miljøstatus.no. Og då er ikkje svinn i landbruket og det som vert kasta frå restaurantar og institusjonar teke med i berekninga.
Matvett AS, som jobbar med å førebyggje og redusere matsvinn, har kartlagt kvar matsvinnet skjer. Ifølgje Matvett var matsvinnet på 390 000 tonn i 2018, og det fordelte seg slik:
- 225 600 tonn hos forbrukarane
- 79 800 tonn i matindustrien
- 62 050 tonn i daglegvarehandelen
- 17 600 tonn hos hotellar, kantiner og i KBS (kiosk-, bensin- og servicehandel)
- 5850 tonn i grossistleddet
Kjelde: miljøstatus.no og matvett.no
Vil du vite meir om avtalen mellom matbransjen og styresmaktene, kan du lese artikkelen Bransjeavtale om matsvinn hos matvett.no.
