Mitt yrkes- og utdanningsval

Kva skal du bli?

For somme er det eit djupt personleg val, for andre er det ikkje like viktig – dei kan ta mange ulike utdanningar og trivst i mange ulike yrke. Same kor sikker du er på kva du vil bli, så kan det vere nyttig å utforske ulike alternativ.

Jo meir informasjon du har om ulike yrkes- og utdanningsval, og jo meir du har reflektert over kva som passar for deg, jo lettare er det å ta eit rett val. Sjølv om du veit akkurat kva du vil bli, kan det hende at du ikkje trivst når du faktisk begynner å jobbe, og då kan det vere fint å ha nokre alternativ. I dagens arbeidsliv er det mange som byter yrke og tek ny utdanning.

I denne casen skal du undersøke ulike yrkes- og utdanningsval. Læringsstien "Mitt yrkes- og utdanningsval" fungerer som ein introduksjon til temaet. I denne læringsstien skal du

• utforske ulike yrke og utdanningar

• få råd og tips om korleis du kan finne eit yrke og ei utdanning som passar for deg

• diskutere fordelar og ulemper med ulike yrkes- og utdanningsval

• reflektere over kva som kjenneteiknar ein meiningsfull jobb, og kva for yrkes- og utdanningsval som passar for deg

De kan gå gjennom alle oppgåvene og artiklane i læringsstien, eller velje ut enkelte delar.

Mange av artiklane og oppgåvene i dette tverrfaglege emnet er laga i samarbeid med VIP Psykisk helse i skolen.