Vårlauk
Det meste av lauken som blir seld som vårlauk, er ein sort som ikkje dannar noka fortjukking nedst, slik vanleg kepalauk gjer. Kepalauk som blir teken opp svært tidleg og seld med det grøne graset, blir også seld som vårlauk, og han kan ha ei fortjukking nedst.
Bruksområde
Vårlauk blir nytta naturell i salatar og dressingar. Han kan òg kokast, smørdampast, steikjast eller nyttast i wok, men hugs at vårlauk ikkje skal varmebehandlast lenge. På grunn av den fine, milde smaken er han mykje nytta i salatar, og i Sverige blir han kalla for salatlauk. Dei grøne blada kan nyttast som graslauk, sjølv om smaken kan vere noko sterkare.
Kvalitetskrav
Vårlauk skal vere heil, rein og fri for frostskadar. Lauken skal vere sprø og fersk, og toppen skal ha ein frisk grønfarge.
Næringsinnhald
Vårlauk har ein mild og aromatisk smak og er ideell for barn som elles måtte finne annan lauk for sterk. Vårlauk og andre laukvariantar inneheld antioksidantar som er bra for forsvarssystemet til cellene.
Sjå Matvaretabellen frå Mattilsynet for nærare opplysningar om næringsinnhaldet.
Hugselappen
Norsk sesong:
juni–oktober
Med andre ord:
latin: Allium fistulosum
engelsk: spring onion
tysk: Frühlingszwiebeln
fransk: oignon de printemps
Lagring:
0–2 °C. Vårlauk har kortare haldbarheit enn purrelauk og må oppbevarast kjølig med høg luftfukt.