Karakterutvikling og teikneserie

Korleis kan du skape ein teikneseriefigur og gi han særtrekk og personlegdom? I denne oppgåva skal du først utvikle ein karakter og så plassere han inn i ein draumeby. Til slutt skal du lage ein kort teikneserie som beskriv ein situasjon eller ei hending.

Ein penneteikna serie som visualiserer det å falle pladask for nokon, og ein teikneserie i fargar som leikar med behovet for ein superhelt. Illustrasjon.

Til læraren

Denne oppgåva kan bygge vidare på desse ressursane:

Tverrfagleg samarbeid med norsk

Oppgåva kan òg brukast i eit tverrfagleg samarbeid med norskfaget. Då kan elevane samtidig lære om visuelle og språklege verkemiddel og bruke dette i teikneserien sin.
Ein inngang til prosjektet kan vere læringstien Forteljeteknikk i teikneseriar.

Ei moglegheit er at elevane lagar moderniserte utgåver av ein litterær karakter, som til dømes Gunnlaug Ormstunge. Karakterar elevane har utvikla sjølve, kan òg brukast og setjast inn i teikneseriar som beskriv episodar frå litteraturhistoria, til dømes eit utdrag frå Trymskvadet. Her kan dei kombinere med trekk frå ein valfri stilepoke.

Utstyr

Vel teknikk og format sjølv.

Del 1: Karakterutvikling

Du skal skape ein karakter eller (super)helt. Teikn skisser der du utviklar karakteren:

Karakteren skal ha minst tre personlege kjenneteikn.
Legg vekt på ansiktsuttrykk og klesstil.
Karakteren må kunne bevege seg.

Legg alle skissene inn i prosessheftet ditt.

Utvikling av ein teikneseriefigur: ung kvinne i heilfigur frå tre ulike vinklar og portrett av ansiktet hennar. Illustrasjon.

Det er KDA-elevar ved Bergeland vidaregåande skule i Stavanger som har laga alle illustrasjonane i denne artikkelen. Her har Bendicte Huth jobba digitalt og viser portrett av karakterane og figurane sett frå ulike vinklar.

Portrett av teikneseriefigur og den same i heilfigur frå tre ulike vinklar. Illustrasjon.

Del 2: Draumeby

På vg1 lærte du om å skape djupne i artikkelen "Illusjon av djupne". Bruk denne kunnskapen og teikn din eigen draumeby. Vel nokre djupneskapande verkemiddel som du vil konsentrere deg om. Det kan til dømes vere linjeperspektiv. Bruk fantasien og leik med fargar og former.

Her har Aurora Joakimsen Hagen (over) og Nanna Løland (under) brukt topunktsperspektiv og leika med storleikar, overlapping og fargekontrastar.

Del 3: Teikneserie

Zoom inn på ein del av draumebyen du teikna i del 2. Lag minst to utsnitt frå bybiletet der du plasserer ein eller fleire karakterar eller figurar. Du kan bruke delar av originalteikninga di, eller du kan lage eit nytt utsnitt.

Tenk på perspektivet. Du kan velje fugleperspektiv, froskeperspektiv eller normalperspektiv.
Leik med storleikar og rom, og skap djupneverknad.

Lag eit kort, lite handlingsforløp på tre ruter eller meir. Du kan til dømes beskrive ein situasjon minutt for minutt, og du treng ikkje å finne på resten av historia.

Ein teikneseriefigur sit høgt oppe på eit stillas og ser utover byen. Illustrasjon.

Her har Kasper Steinsland Asmarvik først jobba for hand og så forenkla uttrykket og jobba vidare digitalt.

Biletserie der ein ung mann sit på eit høgt stillas og ser utover byen. Han ser ei jente på eit tak og tek spranget ut frå stillaset. Illustrasjon,

Innlevering

teikneserie med minst to ulike utsnitt
skisseprosess og karakterutvikling
prosesshefte frå del 1 og 2
eigenvurdering av arbeidsprosessen din og det ferdige resultatet

Relatert innhald

Teikn og utvikle din eigen karakter

Korleis kan du utvikle din eigen karakter? I denne oppgåva skal du jobbe både med teikning og med å forme eit tredimensjonalt hovud i leire.

Topunktsperspektiv

Når du skal teikne skråstilte gjenstandar og bygningar, treng du to forsvinningspunkt. Lær å skape djupne med perspektivteikning, og teikn ein draumeby.