Pynting av peparkaker

Peparkaker høyrer jula til. Ikkje berre smaker dei godt, dei gir òg eit godt høve til kreativ utfalding. I denne filmen viser konditoren deg nokre gode teknikkar for å dekorere fine peparkakehjarte til jul.

Video: Jarle Sten Olsen / CC BY-ND 4.0

Dekorering av peparkaker

Du treng

ferdig steikte peparkaker. Tips: Om du penslar peparkakene med eggekvite før steiking, blir dei ekstra blanke. Du kan òg dekorere med mandlar som du set i ein blomsterformasjon på peparkakene før steiking.
melis (mengda kjem an på kor mange peparkaker du skal dekorere)
eggekvitar
sprøytepose eller papirkremmarhus

Slik lagar du melisglasuren

Sikt melis med ei mjølsikt.
Ha melisen opp i kjøkkenmaskina.
Bruk K-kroken og set på maskina på cirka 1/3 fart. Spe med eggekvite mens maskina går.
La ho gå i cirka 5–10 minutt, og juster med eggekvite undervegs.
Prøvesprøyt litt før du tek alt i ein pose. Juster om nødvendig med meir eggekvite.

Slik dekorerer du

Lag ein plan før du startar dekoreringa. Om du lagar store peparkakehjarte, er det fint med ein bord langs kanten og kanskje ei hyggeleg skrift.
Klipp eit passe stort hol i posen med melisglasur. Pass på at holet er perfekt klipt, rett over.
Prøvesprøyt alltid litt på bordet før du sprøyter på peparkaka.
Bruk ein bord eller ei anna dekorering som du liker.

To peparkakehjarte som er fint dekorerte med melisglasur. Det eine har ein dekorativ bord, teksten God jul og raudt silkeband gjennom eit hol. Det andre har to blomstrar av skålda mandlar og ein samanhengande, dekorativ melisbord rundt kanten. Foto.