Mov håhkoe
Ella Holm Bull
Giesie.
Mov håhkoe Johkegaskesne båetedh,
gåetiem baeledh, aerniem reejnedh,
riehpienistie hievnien-viermieh sööpedh.
Doerkh dåajodh, doerkestidh.
Dueljiem joevehtidh.
Dållem bïejedh.
Tjaetsiem gaalitijstie veedtjedh.
Gïemhpestahkesne prïhtjh-giebniem steeredh,
prïhtjegem voessjedh.
Tsaapestahkem voesseste ohtsedidh
Tsaapedh, prïhtjegem jovkedh.
Åejjie-nalhkem deejedh.
Veelestidh.
Stoerre-johken såakem goltelidh.
Nahkestidh.
Fahkedh.
Dålle jamhkeme.
Aernesne nuvhlieh baatseme.
Soeveste jïh orre doerkijste njaelkies-laakan åågkesje.
Annje Stoerre-johken fuersiem goltelidh guktie såaka.
Jïh manne leam daesnie.
Johkegaskesne, maana-baelien gåetesne.
Relatert innhold
Daennie sæjrosne laavenjassh dikti bïjre mejtie boelhken 1995 raejeste tjaaleme.
Guktie tjaelije ussjede? Maehtebe maam akt dan åssjaldahki bïjre jiehtedh? Daesnie åadtjoeh voejhkelidh tjaelijen åssjaldahkide goerehtidh.