Fagstoff

Aalkoe-almetji gïeli bïjre

Man åvteste gïele vihkele aalkoe-almetji kultuvrese jïh seabradahkese? Man håvhtadihks aalkoe-almetji gïelh?

Golme vuejeme-råantjoeh. Geasastahki tjaebpies klaerieh. Låavthgåetie jïh almetjh duekesne. Guvvie.

Håvhtadihks gïelh

Gïele almetjen identiteetem, jïjtje-domtesem jïh ektievoete-domtesem nænnoste jïh åålmeh-tjïertese ektede. Dan åvteste gïele lea joekoen vihkele saemiej jïh jeatjah aalkoe-almetji kultuvrese jïh seabradahkese.

Veartenisnie jïjnjh vaenie-låhkoen aalkoe-almetji gïelh. Aalkoe-almetji gïeli jïjnjh baakoeh dovletje jielemi jïh jieleme-dajvi bïjre. Stoere seabradahkesne jïjnje mij evtiesovveme jïh jeatjahtovveme dej minngemes jaepiej. Nimhtie aalkoe-almetji jielemh jïh kultuvrh aaj jeatjahtovveminie, jïh nimhtie aaj gïeligujmie.

Aalkoe-almetji gïelh dejstie stuerebe ammes gïelijste baajnehteminie jïh gellene lehkesne dah gïelh håvhtadihks. Jis aalkoe-almetji gïelh nåhkieh dellie aaj veartenen almetji daajroeh jïh maahtoeh eatnemen jïh jieleme-vuekiej bïjre gaarvanieh.

Gellie aalkoe-almetji gïelh leah UNESCO:n læstosne mij soptseste man håvhtadihks dah joekehts gïelh. Saemien gïelh aaj dennie læstosne.