Mij vuejeme-leahpide daerpies?

1. Vaestedh

2. Goltelh, lohkh jïh vaestedh

Pïere sov orre sygkelem voelpide vuesehte

Pïere: Gïehtjh, daate mov motovre-sygkele.

Nejla: Jöödtedh! Dïhte eevre orre?

Pïere: Ij leah eevre orre, men dïhte orre munnjien. Jïh dïhte mov voestes motovre-sygkele.

Krïhke: Vååjnoe goh joekoen hijven sygkele!

Pïere: Nov gujht.

Nejla: Magkere sygkele daate?

Pïere: Husqvarna TC 125.

Nejla: Dïhte sån buerie mïerhke.

Krïhke: Mannasinie dov orre sygkele ajve bïjlen gåetesne tjåådtje? Mannasinie ih skuvlese vuejieh gosse motovre-sygkelem åtnah?

Pïere: Ij mov naan vuejeme-leahpa ennje, dannasinie im åadtjoeh geajnosne vuejedh.

Krïhke: Mah datne trafikaale maadth-kuvsjem vaalteme?

Pïere: Jaa, hævvi, jïh dannasinie manne åadtjoem haarjanidh vuejedh. Daelie tjarki teorije-pryövemasse lohkem, juktie båetijen våhkoen edtjem pryövemem darjodh.

Nejla: Manne vïenhtem datne vuejeme-leahpam åtnah båetijen asken.

Pïere: Hååhkesjem. Mah datne tuhtjih aelhkie vuejeme-pryövemem darjodh, Nejla?

Nejla: Ånnetji geerve lij, men datne gujht buektehth.

Vaestedh

1. Mannasinie ij Pïere åadtjoeh motovre-sygkelem geajnosne vuejedh?

2. Gie vuejeme-leahpam åtna?

3. Maam Pïere tjuara darjodh åvtelen dïhte pryövoe vuejeme-leahpam vaeltedh?

3. Goltelh, lohkh jïh vaestedh

Pïere: Nejla, datne hov mopedem skuvlese vuajah. Mij klaasside dov vuejeme-leahpan? Maam datne darjoejih guktie åadtjoejih vuejeme-leahpam vaeltedh?

Nejla: Mov lea vuejeme-leahpa klaasse AM146. Manne trafikaale maadth-kuvsjem veeltim gosse 15.-n jaepien båeries.

Pïere: Jïh dellie datne haarjanih mopedem vuejedh?

Nejla: Ijje, idtjim åadtjoeh haarjanidh vuejedh trafikaale maadth-kuvsjen mænngan. Voestegh manne tjoerim maadth-våarome ööhpehtimmiem vaeltedh. Manne lïerim guktie mopedem gïetedidh jïh guktie vuejedh. Dellie 3 tæjmoeh teoretihkeles ööhpehtimmiem veeltim.

Pïere: Men dellie datne åadtjoejih haarjanidh mopedem vuejedh?

Nejla: Nov gujht, manne vuejeme-lohkehtæjjine haarjanim. Manne dovne voenesne jïh staaresne vööjim. Dan mænngan tjoerim dam minngemes kuvsjem vaeltedh. Dïhte lij 4 tæjmoen kuvsje gusnie lïerim guktie jearsoeslaakan trafihkesne vuejedh. Minngemes teorije-pryövemem veeltim.

Pïere: Man dovres dov mopede-laehpa sjïdti?

Nejla: 9.440 kråvnah. Trafihke-skuvlese 9.000 kråvnah meeksim, jïh dellie 350 kråvnah teorije-pryövemen åvteste jïh minngemes 90 kråvnah leahpan åvteste.

Vaestedh

1. Buerkesth dah taalh soptsestallemisnie:

1. 146

2. 3

3. 4

4. 15

5. 9.000

6. 350

7. 90

2. Mah Nejla åådtje Pïeren motovre-sygkelem vuejedh?

3. Maam vuajahtahkide Nejla åådtje vuejedh? Gïehtjh vegvesen.no.

4. Goltelh, lohkh jïh vaestedh

Pïere: Sööfe, datne motovre-sygkelem ajve vaerine vuajah. Mah dov naan vuejeme-leahpa?

Sööfe: Jaa hævvi.

Pïere: Mij klaasside dov vuejeme-leahpan?

Sööfe: Mov lea vuejemeleahpa klaasse A1. Manne trafikaale maadth-kuvsjem veeltim gosse 10.klaassesne noere-skuvlesne.

Pïere: Man dovres dov vuejeme-leahpa sjïdti?

Sööfe: 21.000 kråvnah.

Pïere: Åå, man dovres!

Sööfe: Nov sån dovres, men tuhtjem hijven manne vuejeme-leahpam veeltim jalhts ajve vaerine vuajam. Ussjedh jis ov-læhkoe sjædta jïh ij mov naan vuejeme-leahpa!

Pïere: Åå hemmede ligen!

Vaestedh

1. Buerkesth dah taalh soptsestallemisnie:

   1. 10

   2. 21.000

2. Mah Sööfe åådtje Nejlan mopedem vuejedh?

3. Mah vuajahtahkh Silje åådtje vuejedh?

4. Mij heannede jis ov-læhkoe sjædta jïh Siljen ij naan vuejeme-leahpa?