Elsa Laulan bïjre

Elsa Laula reakadi rahkan 29. b. 1877 Jïjnjesovvenisnie (Storsele), Vualtjeren dajvesne, jïh dïhte snjaltjen 22. b. 1931 Brønnøysundesne gåbloe-gossehtahkeste sealadi. Dïhte lij båatsoe-saemie, organisasjovne-tseegkije, aktiviste, tjaelije jïh politihkere. Dïhte lij meatan voestes saemien-siebriem, Lapparnas Centralförbund, tseegkedh jaepien 1904.

Mïetsken 1904 Elsan gærja «Inför lif eller död: Sanningsord i de lapska förhållandena» bööti. Gærjan 30 sæjroeh jïh Laula vihkeles saemien aamhtesi bïjre tjeeli, v.g. saemieh edtjieh dej skaehtie-laantide eekedh jïh saemien-gïelem skuvlesne lohkedh. Laula sveerjen-gïelesne tjeeli guktie dah daatjh edtjin dam guarkedh.

Nöörjese juhti

Elsa Laula jaepien 1908 Tomas Peder Tovenine pruvri, hïejen mænngan dah guaktah minngie-nommem Renberg veeltigan.

Elsa siebriem Brurskanken Lappkvindeforening jaepien 1910 (Brovresen Saemienyjsene-siebrie) tseegki. Siebrie lij voestes saemien nyjsene-siebrie mij nyjseni aamhtesigujmie barki. Daate lij åvtelen nöörjen nyjsenæjjah veeljeme-reaktam åadtjoejin. Dej beeli daaroedehteme saemiej vööste lij tjarke, jïh idtjin nyjsenæjjah byörh fer jïjnjem vååjnesasse båetedh.

Elsa Laula Renberg jïh doh mubpieh åarjel-saemien nyjsenæjjah lin naakenh mijjen åvte-nyjsenæjjijste dovne saemiej jïh nyjsenæjjaj reaktaj åvteste. Daejtie lij eevre vihkele saemien ålmah jïh nyjsenæjjah tjoerin ektesne tjåadtjodh laante-raastaj dåaresth juktie edtjin lyhkesidh gæmhposne jieliemassem jïh saemien kultuvrem gorredidh. Laula Renberg lij meatan voestes saemien rïjhke-tjåanghkoem Tråantesne öörnedh, goevten 6. b. 1917.