Article
Amanda Kernell
Histovrijen tjïrrh gellie filmh saemiej bïjre dorjesovveme filme-darjoejijstie mah eah saemieh. Daan biejjien gellie filmh dorjesovveme saemien filme-darjoejijstie. Amanda Kernell (1986) lea aktede dejstie – voestes saemien nyjsenæjjijste mij guhkies-filmem regisseradamme.
Filmedarjoje Amanda Kernell. Image: Anders Wiklund / CC BY-NC-SA 4.0
Amanda Kernell saemien filme-darjoje Ubmejistie Sveerjesne. Eelki regissöörine barkedh gosse 18 jaepien båeries jïh gellie åenehks-filmh dorjeme åvtelen filmem Saemien vïrre (2016) darjoeji. Kernellen filme Saemien vïrre buerie lahtestimmieh åadtjoeji gosse filme veartene-premijeerem utni filme-festivaalesne Veneziesne. Dan mænngan filme gellie festivaaline orreme abpe veartanisnie.
Saemien vïrre lea voestes spïele-filme gusnie dorjehtæjjah åarjel-saemien gïelem soptsestieh, jïh voestes guhkies-filme maam akte saemien nyjsenæjja dorjeme. Filme Veiviseren (1987), maam Nils Gaup dorjeme, lea voestes filme gusnie dorjehtæjjah noerhte-saemien gïelem soptsestin. Veiviseren Oscar-åasese nammoehtovvi klaassesne bööremes ammes-gïele filme.
- Saemien vïrre, spïele-filme, 2016
- I will always love you Kingen, åenehks-filme, jaepien 2016
- Stoerre Vaerie (Northern Great Mountain), åenehks-filme, jaepien 2015
- Paradiset (Eutiopia), åenehks-filme, jaepien 2014
- The Association of Joy, åenehks-filme, jaepien 2013
- Det kommer aldrig att gå över, åenehks-filme, jaepien 2010
- Spel, åenehks-filme, jaepien 2009
- Att dela alt (Sharing all), åenehks-filme, jaepien 2009