Dïejvesh

Dïejvesh åenehks jiehtegh/raajesh mah soptsestieh saetnies-voeten, åssjalommesi, vuekiej, mïeli jïh aarvoej bïjre. Gaajhkh almetjh veartenisnie daagkerh dïejvesh utnieh ovmessie haamojne. Dah jïjnjem soptsestieh almetji kultuvri jïh siebriedahki bïjre, båeries aerpievuekiej jïh jieledevuekiej bïjre. Gellie daagkeres dïejvesh dovne sijjeste sæjjan vyjrehkasse jåhteme juktie mahte seammalaakan sjïdteme veartenen almetji kultuvri gaskem.

Saemiej aaj dïejvesh. Dej baaktoe åadtjobe daejredh guktie saemieh åvtesne veasome jïh ussjedamme, guktie veartenem gïehtjedamme jïh mïsse jaahkeme. Dah aaj soptsestieh guktie darjodh jïh guktie dåemiedidh, jïh maam saemieh utniejin vihkeles jïh maam ij.

Ibie daejrieh gïeh mah dïejvesidie voestes aejkien jeahteme jallh gåessie. Dah dan hijven jeahtasovveme juktie akten almetjen njaelmeste mubpien almetjen njaalman jåhteme guhkede gietjeste eevre daan beajjan.