Korleis posjere egg?
Ved posjering av egg er det vanleg å bruke vatn tilsett salt og eddik, både for smak og for at egget skal koagulere raskare. Egget skal posjerast utan skal og krev derfor at temperaturen blir halden under kokepunktet. Koker vatnet, vil egget koke sund. Temperaturen ved posjering av egg bør vere mellom 85 og 95 gradar.
Ferske egg gir best resultat då eggekviten er fastare og meir samla rundt eggeplomma. Jo eldre egget er, jo meir tyntflytande er eggekviten, og han vil derfor ikkje samle seg så godt rundt eggeplomma.
Framgangsmåte
Varm vatn tilsett salt og eddik opp mot kokepunktet.
Knekk egga som skal posjerast, og ha dei enkeltvis i passande beger. Viss egga er ferske og eggekviten ikkje er så flytande, kan fleire egg samlast i ein bolle.
Før du tilset egga eit og eit i vatnet, er det tilrådd å røre kraftig i vatnet slik at det blir skapt sirkulasjon. Dette vil bidra til å samle eggekviten rundt eggeplomma ved posjering.
Hell så egga over i vatnet. Hald vatnet i rørsle ved å røre i ytterkant av kjelen. Hald temperaturen under kokepunktet heile tida under tillaginga.
Egga er ferdig posjerte når all eggekviten har koagulert, utan at eggeplomma har koagulert. Løft egga ut av vatnet og over i ein bolle med isvatn, eller servar dei med det same.
