I programfaget Komplettering og brønnservice blir du kjend med utstyret som blir brukt for å klargjere ein brønn for produksjon, og utstyret som blir brukt til brønnvedlikehald. Du finn fleire filmar og animasjonar som viser korleis arbeidet blir utført og kva utstyr som blir brukt.

Komplettering og brønnservice er delt inn i tre emne som til saman vil gi deg ei oversikt over arbeidsoppgåvene som inngår i fagretningane komplettering og brønnservice-operatør.

I emnet feltutvikling lærer du om olje og gass-reservoara som er interessante for utbygging. Vidare skal du kjenne igjen dei ulike typane installasjonar som blir brukte til komplettering og brønnservice-aktivitetar offshore og om oppstart og nedstenging av brønnar.

I emnet komplettering lærer du om utstyr og metodar som blir brukte for å klargjere ein brønn for produksjon. Du lærer om kva utstyr som passar til dei ulike reservoareigenskapane og trykkforholda i reservoaret. Her får du òg god kjennskap til kvar i brønnen utstyret skal installerast og kva oppgåve utstyret har.

I emnet brønnintervensjon lærer du om utstyret som blir brukt på overflata og i brønnen når brønnen skal haldast ved like, blir reparert eller blir stengd ned. Vi skil mellom kabeloperasjon og kveilerøyrsoperasjon i samband med brønnservice-oppdrag. Nokre oppdrag blir òg utførte frå serviceskip som "lett brønnintervensjon".

Sentrale tema i Komplettering og brønnservice er barrierar i og på brønnen og overflateutstyr og nediholsutstyr som blir brukt i samband med brønnarbeidet.