Massemedia gjennomsyrar kvardagen vår som aldri før. Barn som veks opp på byrjinga av 2000-talet, blir gjerne kalla «multimediegenerasjonen».
Multitasking
Dei er omgitt av:
- tv
- film
- aviser
- vekeblad
- teikneseriar
- bøker
- Internett
- mobiltelefon
- dataspel
- musikk-cd
Barn og unge er kjappe til å ta i bruk ny teknologi. Dei er flinke til å «multitaske» og handtere fleire medium på same tid. Ein typisk situasjon er at dei sit heime på soverommet og pratar med venner på mobilen, samtidig som dei spelar eit online-spel på pc-en, oppdaterer Facebook-profilen sin, chattar på MSN og har fjernsynet og stereoanlegget ståande på i bakgrunnen.
Kvardagen til barna handlar i høg grad om å vere pålogga. Dei lever midt i ein straum av inntrykk og bodskapar. Dei fleste navigerer godt i denne straumen, men ganske få er klar over kva massemedia gjer med dei på godt og vondt.
Utfordringar til deg
- Sjå på lista over. Kor mykje tid bruker du på kvart medium på ei veke?
- Intervju barn i ulike aldersgrupper og finn ut kor mykje tid dei bruker på dei ulike media.
- Kva betyr ordet «multitaske»?
- Gjer deg kjend med rammeplanen for barnehagen og temaheftet om «IKT i barnehagen».
CC BY-NC-SASkrive av Einar Gjærevold, Guri Bente Hårberg og Gro Nedberg Grønlid. Rettshavar: Terranova Media
Sist fagleg oppdatert 26.02.2018