Soptsesh, vuelieh, dikth jïh jeatjah teeksth soptsestieh guktie almetjh jealeme, ussjedamme jïh domteme tïjji mietie. Gosse mijjieh teeksth lohkebe dellie maehtebe aelkedh ussjedidh, maam akt lïeredh jallh måarahtovvedh. Lissine teeksth maehtieh mijjem faepieldidh jallh madtjeldehtedh.

Fïerhten biejjien mijjieh teeksth lohkebe, jïh jeenemes aamhtese-teeksth. Dellie lohkebe mij veartanisnie heannede gusnie jielebe. Aamhtese-teeksth leah teeksth goh tjåanghkoe-referaath, prievieh, kååserijh, esseyh, faage-teeksth, lohkije-teeksth j.n.v.

Mijjieh artihkelh lohkebe, skuvlesne jïh barkoe- jïh seabradahken jieliedisnie. Artihkele akte sjangere gusnie krïevenasse saakelesvoeten bïjre lea jarngesne. Mijjieh joekehts såarhts teeksth gaavnebe gærjine, plaerine, tjaalaldahkine, leksikovnine jïh brosjyrine – paehpierisnie jïh nedtesne.